Ministria e Ekonomisë e Gjermanisë thotë se skema do ofrojë mbështetje “të shpejtë dhe të besueshme” për industritë kimike, të qelqit dhe të plastikës në vend © Bloomberg
Gjermania po eksploron mënyra për të financuar subvencione miliarda euroshe për kompanitë që përdorin shumë energji, si pjesë e premtimit të kancelarit Friedrich Merz për të rritur konkurrueshmërinë e industrive të rënda të vendit.
Masa është pjesë e përpjekjeve për të ulur kostot e energjisë elektrike për grupet industriale, me qëllim rigjallërimin e ekonomisë më të madhe të Eurozonës pas periudhës më të gjatë të ngecjes pas luftës.
Por plani është në rrezik pasi uljet e premtuara të taksave të energjisë elektrike për familjet u shtynë për shkak të kufizimeve buxhetore.
Shqetësimet financiare kanë krijuar tensionet e para të rëndësishme brenda koalicionit qeverisës midis CDU-së së Merz, partisë së saj simotër bavareze CSU dhe SPD-së.
Javën e kaluar, kreu i partisë CSU, Markus Söder, kritikoi ministrin e Financave dhe zv/kancelarin Lars Klingbeil, i cili është gjithashtu bashkëkryetar i SPD-së, për moszbatimin e uljeve të taksave të energjisë elektrike për konsumatorët në buxhetin e tij të parë. Masa do kishte kushtuar rreth 5.4 miliardë euro në vit.
Pavarësisht këtyre shqetësimeve buxhetore, Katherina Reiche, ministrja gjermane e Ekonomisë, dëshiron të zgjerojë numrin e kompanive gjermane që kanë të drejtë për subvencione të çmimeve të energjisë elektrike nga 350 në 2,200, sipas njerëzve që kanë dijeni për planin.
Masa do financonte deri në gjysmën e faturave të energjisë elektrike të kompanive gjatë tre viteve dhe do t’i kushtonte shtetit rreth 4 miliardë euro, sipas vlerësimeve paraprake, thanë ata.
Ministria e Ekonomisë pret që plani të jetë në përputhje me kuadrin e ri të ndihmës shtetërore të BE-së, të përshkruar muajin e kaluar, thanë ata, shkruan FT.
Reiche, një ish-ekzekutiv i energjisë nga CDU-ja, i bëri presion Brukselit që të lejonte mbështetje më të madhe shtetërore për industritë e rënda të Gjermanisë, duke argumentuar se Eurozona do përfitonte nëse ekonomia e saj më e madhe do fillonte të rritej përsëri.
Gjermania ka duruar kosto më të larta të energjisë pjesërisht për shkak të mbylljes së energjisë bërthamore dhe vendimit të saj për t’u larguar nga gazi i lirë rus pas pushtimit të plotë të Ukrainës nga Moska në vitin 2022.
Ministria e Ekonomisë tha se skema do synonte të ofronte mbështetje “të shpejtë dhe të besueshme” për industritë kimike, të qelqit dhe të plastikës, të cilat kanë “një ndikim të gjerë në sektorë të tjerë përmes zinxhirëve të vlerës”.
Biznesi gjerman paralajmëron se rekrutimi në ushtri do thellonte mungesën e punëtorëve
“Ne po zhvillojmë një koncept të qëndrueshëm që do ta bashkërendojmë brenda qeverisë dhe do ta mbikëqyrim nga afër në bashkëpunim me Komisionin Evropian”, tha ajo.
Muajin e kaluar, Komisioni tha se do t’u lejonte shteteve anëtare të subvenciononin deri në gjysmën e kostove të energjisë së kompanive industriale për t’i ndihmuar ato të dekarbonizohen. Vendimi u pa nga shumë në Bruksel si një mënyrë për të ndihmuar Merz-in të përmbushte premtimin e tij të fushatës.
Por një shpenzim i tepruar pas zgjedhjeve e ka ngarkuar koalicionin e Merz me një problem tjetër: një shkelje të mundshme të rregullave fiskale të BE-së. Berlini, i cili ka liruar limitin kushtetues të huamarrjes për të rritur shpenzimet për mbrojtjen dhe infrastrukturën, do paraqesë planin e tij të shpenzimeve këtë muaj për katër vitet e ardhshme.
Gjermania, e cila ka qenë prej kohësh roje e disiplinës fiskale të BE-së, tani parashikon që deficiti i saj federal do rritet në 82 miliardë euro këtë vit, nga 33 miliardë euro vitin e kaluar. Kjo pritet të zgjerohet në 126 miliardë euro deri në vitin 2029, sipas Ministrisë gjermane të Financave.
Çmimi i ulur i planifikuar i energjisë elektrike për industritë ende nuk është shqyrtuar nga Ministria e Financave, thanë njerëzit e njohur me çështjen. Nëse miratohet, Komisioni i BE-së do duhet të miratojë zyrtarisht ndihmën shtetërore.
