Kancelari gjerman Friedrich Merz ka mbështetur vendimin për të mos e ngritur flamurin e ylberit në ndërtesën e Reichstag, ku ndodhet edhe parlamenti gjerman, gjatë festimeve të festës LGBTQ në Berlin, duke thënë se ndërtesa “nuk është një tendë cirku”.
Julia Klöckner – presidentja e dhomës së ulët të parlamentit të Gjermanisë, Bundestag – kishte vendosur të mos e ngrinte flamurin në Reichstag gjatë festimeve të paradës LGBTQ.
I pyetur për vendimin e Klöckner, Merz i tha televizionit publik gjerman ARD të martën se “Bundestagu nuk është një tendë cirku”, ku flamujt mund të ngrihen sipas dëshirës, shkruan Yahoo.
Flamuri, një simbol për komunitetin LGBTQ, ngrihet një ditë në vit më 17 maj, për të shënuar ditën ndërkombëtare kundër homofobisë, tha ai.
“Në të gjitha ditët e tjera, flamuri gjerman dhe flamuri evropian valëviten në Bundestagun gjerman, dhe asnjë tjetër. Dhe ky vendim është i duhuri.”
Secili mund të valëvisë çfarëdo flamuri që dëshiron në derën e vet, tha kancelari.
“Por ne po flasim për parlamentin gjerman këtu, dhe në parlamentin gjerman, ne nuk valëvitim asnjë flamur çdo ditë, por flamurin kombëtar gjerman dhe flamurin evropian.”
Ndërtesa e Reichstagut – ku ndodhet Bundestagu – valëviti për herë të parë flamurin LGBTQ në vitin 2022. Ish-presidenti i Bundestagut, Bärbel Bas, tha se ngritja e flamurit do tregonte një zotim ndaj shumëllojshmërisë. Vendimi i Klöckner për të mos ngritur flamurin në parlament u kritikua nga partitë opozitare, të Gjelbrit dhe të Majtët.
