Zëdhënësi i Forcave të Mbrojtjes së Izraelit (IDF), gjeneral brigade Efi Defrin, deklaroi se ushtria izraelite ka përmbushur plotësisht objektivat e saj në kuadër të Operacionit “Me Guxim”, që synonte objektiva iraniane, përcjell YNetNews.
Në një deklaratë për mediat, Defrin theksoi se “IDF ka arritur të gjitha objektivat e përcaktuara në këtë operacion”. Ai shtoi se ushtria izraelite po vazhdon të veprojë në të gjitha frontet, përfshirë edhe Rripin e Gazës.
Sipas tij, pesë divizione të IDF janë të angazhuara njëkohësisht në operacione tokësore brenda Gazës: “Luftëtarët tanë po manovrojnë me intensitet të lartë, në mënyrë profesionale dhe efektive. Po luftojmë në shumicën e territorit të Gazës dhe kemi dëmtuar seriozisht qeverisjen e Hamasit. Po parandalojmë rikthimin e tyre në bazat e pushtetit.”
Deklarata e IDF vjen në një moment kur tensionet në rajon mbeten të larta, ndërsa komuniteti ndërkombëtar vazhdon të bëjë thirrje për një armëpushim dhe zgjidhje diplomatike të konfliktit.
