Autoritetet iraniane kanë ngritur akuza të rënda ndaj dy shtetasve francezë, Cécile Kohler dhe Jacques Paris, të cilët ndodhen në paraburgim në Iran prej më shumë se tre vitesh. Dyshohet se ata kanë kryer “spiunazh për Mossad-in” dhe janë përfshirë në një “komplot për rrëzimin e regjimit”, përcjell YNetNews.
Lajmi është konfirmuar nga një burim diplomatik perëndimor për agjencinë e lajmeve AFP, i cili ka theksuar se “nuk ekziston asnjë bazë për këto akuza”.
Franca ka kërkuar në mënyrë të përsëritur lirimin e të dy shtetasve të saj, duke i konsideruar akuzat si politike dhe të pabazuara në fakte. Kohler dhe Paris janë në mesin e disa të huajve të ndaluar në Iran, të cilët organizatat ndërkombëtare për të drejtat e njeriut i konsiderojnë si “pengje diplomatike”, të përdorura nga Teherani për presion ndaj vendeve perëndimore.
