Zyrtarë të lartë të Forcave të Mbrojtjes të Izraelit (IDF) deklaruan të enjten se Irani mund të tentojë një rikthim drejt programit të tij bërthamor pas luftës 12-ditore që përfundoi së fundmi, por se Izraeli është i përgatitur ta ndalojë në çdo moment – madje më i gatshëm se më parë, përcjell Jerusalem Post.
Sipas burimeve ushtarake izraelite, përvoja dhe vetëbesimi i fituar nga kjo përballje e fundit e kanë bërë IDF-në më të përgatitur për çdo skenar të mundshëm. Ky mesazh u përforcua edhe nga drejtori i Mossad-it, David Barnea, i cili u shpreh me sfidë ndaj Teheranit: “Ne do të jemi aty, siç kemi qenë gjithmonë.”
Në një seri zbulimesh të bëra nga IDF, u bë e ditur se ndryshimet në strukturën dhe strategjinë e ushtrisë izraelite kishin nisur që në fillim të vitit 2023, me fokus të qartë për t’u përgatitur për një përballje të drejtpërdrejtë me Iranin. Fillimisht objektivi kryesor ishte programi bërthamor iranian, por më vonë u përfshinë edhe objektiva të tjera strategjike.
Pas sulmeve të Iranit ndaj Izraelit në prill dhe tetor 2024 me qindra raketa balistike dhe dronë, IDF ndryshoi perceptimin për Iranin: nga një kërcënim i “rrethit të tretë”, në një kërcënim të afërt, thuajse “në kufi”. Kjo për shkak të agresionit të shtuar të aleatëve të Iranit në Gaza, Liban, Siri dhe Irak.
Në janar 2025, inteligjenca izraelite paralajmëroi se aktivitetet e Iranit në drejtim të prodhimit të armës bërthamore po përshpejtoheshin në mënyrë të rrezikshme. Në maj, shefi i Inteligjencës Ushtarake, gjeneralmajor Shlomi Binder, dha një paralajmërim të nivelit më të lartë, duke deklaruar se Irani mund të jetë vetëm pak muaj larg nga prodhimi i një arme bërthamore.
Megjithatë, sulmi i madh izraelit ndaj Iranit ndodhi vetëm pasi presidenti amerikan Donald Trump u bind përmes rezultateve ushtarake në terren, veçanërisht pas shkatërrimit të 80% të sistemeve kundërajrore iraniane. Në bashkëpunim me SHBA-në, Izraeli arriti ta mbante elementin e surprizës, pavarësisht paralajmërimeve në media për një sulm të mundshëm.
Gjatë luftës 12-ditore, IDF lëshoi mbi 4,600 bomba në objektiva në Iran. Nga ana tjetër, Irani goditi vetëm 36 herë zona të banuara në Izrael, pavarësisht se lëshoi mbi 500 raketa balistike dhe më shumë se 1,000 dronë – vetëm dy prej të cilëve arritën të godasin ndonjë objektiv.
U zbulua gjithashtu se një pjesë e rëndësishme e përpjekjeve të IDF-së përfshinte kufizimin e pranisë ajrore turke në Siri, për të ruajtur fshehtësinë e operacioneve të mundshme drejt Iranit.
Megjithë përmasat e luftës, zyrtarët izraelitë theksuan se ndërrimi i regjimit iranian nuk ishte kurrë një objektiv kryesor. Qendrat e fuqisë së regjimit u goditën vetëm në fund të konfliktit, për të rritur presionin mbi Teheranin që të pranonte armëpushimin.
Shefi i Forcës Quds të Gardës Revolucionare, Esmail Qaani, mbijetoi, pasi nuk ishte objektiv i mundshëm gjatë periudhës së luftës.
