Zyra e Kryeministrit izraelit dhe Shtëpia e Bardhë kanë zhvilluar bisedime eksploruese për të organizuar një takim mes Benjamin Netanyahut dhe Presidentit Donald Trump, raportoi The Jerusalem Post, duke cituar burime të afërta me zhvillimet. Edhe pse nuk është caktuar ende një datë zyrtare, të dyja palët thuhet se kanë interes të përbashkët për një “festë fitoresh” pas përfundimit të luftës me Iranin.
Burime qeveritare izraelite theksojnë se dy çështjet kryesore që do të diskutoheshin në këtë takim janë marrëveshja për lirimin e pengjeve (nëse nuk finalizohet deri atëherë) dhe zgjerimi i Marrëveshjeve të Abrahamit — dy zhvillime të ndërlidhura ngushtë. Sipas zyrtarëve izraelitë, pa përfunduar lufta në Gaza, mundësitë për të shtuar vende të reja në këto marrëveshje janë minimale.
Ndërkohë, është rihapur në tavolinën e diskutimeve ideja e dëbimit të drejtuesve të Hamasit nga Gaza si pjesë e një marrëveshjeje për t’i dhënë fund luftës. Kjo ide është hedhur më herët nga koordinatori izraelit për pengjet dhe të zhdukurit, Gal Hirsch, por ishte refuzuar nga Hamas.
Në një deklaratë të enjten, Netanyahu konfirmoi se Izraeli po synon një “zgjerim dramatik të marrëveshjeve të paqes”.
Nga ana tjetër, ministri i Sigurisë Kombëtare, Itamar Ben-Gvir, shprehu kundërshtim ndaj çdo negociate që do të mund të çonte drejt krijimit të një shteti palestinez. Ai deklaroi se “vetëm një fitore vendimtare përfshirë pushtim, vendbanime dhe qeverisje” do të ishte përgjigja e duhur ndaj, siç tha, “gënjeshtrës palestineze”.
