Drejtori i CIA-s, John Ratcliffe, ka konfirmuar zyrtarisht mbrëmjen e së mërkurës se programi bërthamor i Iranit ka pësuar dëme serioze si pasojë e sulmeve të fundit të synuara ndaj disa prej objekteve më të rëndësishme, përcjell Jerusalem Post.
“Sipas të dhënave të besueshme të inteligjencës, programi bërthamor i Iranit është dëmtuar ndjeshëm nga sulmet e fundit të drejtuara me saktësi,” deklaroi Ratcliffe.
Ai shtoi se sipas një burimi tradicionalisht të besueshëm, disa nga objektet kyçe të programit bërthamor janë shkatërruar plotësisht dhe procesi i rindërtimit të tyre mund të zgjasë me vite.
Ratcliffe theksoi se CIA vijon të mbledhë të dhëna të mëtejshme për të informuar në mënyrë të plotë instancat vendimmarrëse dhe organet mbikëqyrëse të Shteteve të Bashkuara. Ai shtoi gjithashtu se opinioni publik amerikan do të njoftohet, sa herë që të jetë e mundur, për zhvillimet kryesore, duke theksuar rëndësinë kombëtare të çështjes dhe nevojën për transparencë.
Deklarata vjen në një moment kritik pas operacionit ushtarak ndërkombëtar të quajtur “Rising Lion”, i cili ka goditur infrastrukturën ushtarake dhe bërthamore të Iranit në përgjigje të përshkallëzimit të tensioneve në Lindjen e Mesme.
