Presidenti i Iranit, Masoud Pezeshkian, ka shpallur përfundimin e “luftës 12-ditore” me Izraelin, në një mesazh drejtuar kombit që u transmetua nga agjencia shtetërore IRNA.
“Pas rezistencës heroike të kombit tonë të madh, vendosmëria e të cilit shkruan histori, sot jemi dëshmitarë të vendosjes së një armëpushimi dhe përfundimit të kësaj lufte 12-ditore të imponuar nga aventurizmi dhe provokimi i regjimit sionist,” deklaroi Pezeshkian.
Kjo deklaratë vjen në vijim të një përshkallëzimi të rrezikshëm mes dy vendeve, që përfshiu sulme ajrore mbi objekte bërthamore, sulme me raketa dhe përplasje diplomatike, duke rritur ndjeshëm tensionet në Lindjen e Mesme.
Ndërsa detajet e marrëveshjes së armëpushimit ende nuk janë bërë publike, njoftimi i presidentit sinjalizon një pauzë të përkohshme në konfliktin që rrezikonte të përfshinte rajonin në një luftë më të gjerë.
