Ministri i Mbrojtjes së Izraelit, Israel Katz, deklaroi të shtunën se ushtria izraelite ka vrarë një komandant veteran të Gardës Revolucionare Iraniane në një sulm ajror në një apartament në provincën Qom të Iranit. Bëhet fjalë për Saeed Izadi, i cili drejtonte Korpusin e Palestinës të forcës së jashtme të Gardës, të njohur si Forca Quds.
Më vonë, ushtria izraelite njoftoi se kishte vrarë edhe një komandant tjetër të kësaj strukture, Benham Shariyari, gjatë një sulmi ndaj automjetit të tij gjatë natës në perëndim të Teheranit, raporton Reuters.
Sipas ushtrisë izraelite, Shariyari ishte përgjegjës për të gjitha transferimet e armëve nga regjimi iranian drejt aleatëve të tij në Lindjen e Mesme.
Ai akuzohet se ka furnizuar me raketa dhe raketahedhës grupet Hezbollah në Liban, Hamasin në Gaza dhe rebelët Houthi në Jemen, të cilët kanë sulmuar Izraelin.
Deri më tani, Garda Revolucionare Islamike e Iranit (IRGC) nuk ka dhënë asnjë konfirmim për vrasjen e dy komandantëve.
Forca Quds, krahu operativ jashtë Iranit i Gardës Revolucionare, ka ndërtuar ndër vite një rrjet të gjerë aleatësh arabë të njohur si “Boshti i Rezistencës”, që përfshin Hezbollah-in në Liban – të krijuar në vitin 1982 – si dhe grupin militant palestinez Hamas në Rripin e Gazës.
Megjithatë, ky rrjet ka pësuar goditje të mëdha gjatë dy viteve të fundit, pasi ofensivat e Izraelit, të nisura pas sulmeve të Hamasit më 7 tetor 2023, kanë dobësuar ndjeshëm si Hamasin, ashtu edhe Hezbollah-un.
Ministri Katz theksoi se Izadi kishte qenë një figurë kyçe në financimin dhe armatosjen e Hamasit gjatë sulmeve të tetorit, duke e quajtur vrasjen e tij si “një arritje të madhe për inteligjencën izraelite dhe Forcën Ajrore”.
Izadi ishte sanksionuar më parë nga Shtetet e Bashkuara dhe Britania e Madhe për lidhjet e tij me Hamasin dhe fraksionin tjetër palestinez, Xhihadin Islamik, të cilët gjithashtu morën pjesë në sulmet e 7 tetorit.
