Kryeministri izraelit Benjamin Netanyahu publikoi të mërkurën një deklaratë në platformën X (ish-Twitter), duke riafirmuar vendosmërinë e qeverisë së tij për të ndalur ambiciet bërthamore të Iranit, në mes të një fushate ushtarake intensive kundër objektivave iraniane.
“Nuk do ta lejojmë regjimin më të rrezikshëm në botë të marrë armën më të rrezikshme në botë,” shkroi Netanyahu.
Deklarata e tij vjen në kohën kur Forcat e Mbrojtjes së Izraelit (IDF) po kryejnë sulme ajrore të përsëritura ndaj objekteve bërthamore dhe ushtarake iraniane, kryesisht në dhe rreth Teheranit. Izraeli e cilëson këtë ofensivë si një fushatë strategjike për çmontimin e kapaciteteve bërthamore dhe balistike të Iranit.
Postimi i Netanyahu-t ka shkaktuar reagime të shumta në rrjetet sociale, përfshirë edhe komente mbështetëse nga përdorues iranianë. Një prej tyre shkroi:
“Si një iranian, dua të të falënderoj për këtë detyrë të vështirë dhe kaq të rëndësishme që ke marrë përsipër. Nga Kiri i Madh te Benjamin Netanyahu. Çfarë kohe për të qenë gjallë.”
Qeveria izraelite ka theksuar se veprimet ushtarake ndaj Iranit janë parandaluese dhe mbrojtëse, ndërsa kjo deklaratë e Netanyahu-t e pozicionon konfliktin jo vetëm si një çështje të sigurisë kombëtare, por si një kërcënim për rendin global dhe sigurinë ndërkombëtare.
