Samiti i G7 në Kanada këtë javë do të dominohet nga lufta, por jo ajo që liderët botërorë kishin parashikuar.
Në rendin e ditës ishin lufta e Rusisë kundër Ukrainës dhe tarifat tregtare të Donald Trump ndaj partnerëve amerikanë. Megjithatë, takimi tre-ditor në Malet Shkëmbore të Albertës do të fokusohet në konfliktin në Lindjen e Mesme, përcjell BBC.
Vendimi i Izraelit për të sulmuar Iranin ka detyruar fuqitë perëndimore të G7 të devijojnë vëmendjen nga çështje të tjera dhe të diskutojnë mënyrat për menaxhimin e krizës. Britania, Franca, Gjermania dhe Italia—së bashku me Kanadanë dhe Japoninë—po përpiqen të ndikojnë në Shtetet e Bashkuara, pasi presidenti amerikan mbetet lideri me ndikimin më të madh mbi kryeministrin izraelit Benjamin Netanyahu.
Liderët e G7, të cilët pritet të mbërrijnë në Kanada të dielën, janë të vetëdijshëm për rreziqet globale të sigurisë dhe ekonomisë nëse konflikti përshkallëzohet, duke përfshirë vende të tjera dhe duke rritur çmimet e naftës.
Megjithatë, arritja e një qëndrimi të përbashkët mund të jetë sfiduese. Kryeministri britanik Keir Starmer dhe presidenti francez Emmanuel Macron kanë bërë thirrje për vetëpërmbajtje dhe de-përshkallëzim, ndërsa kryeministri japonez Shigeru Ishiba e ka dënuar sulmin izraelit si “të papranueshëm” dhe “jashtëzakonisht të dëmshëm”. Nga ana tjetër, Donald Trump i ka cilësuar sulmet e Izraelit si “të shkëlqyera”.
