Zyrtarët e Kalifornisë fajësuan të hënën presidentin Donald Trump për përshkallëzimin e një gjendje tashmë të tensionuar në Los Angeles duke dërguar trupa të Gardës Kombëtare, ndërsa Shtëpia e Bardhë argumentoi se demonstratat e dhunshme justifikonin rritjen e mëtejshme të përpjekjeve për dëbimin e emigrantëve të paligjshëm.
Trump madje sugjeroi që Guvernatori i Kalifornisë, Gavin Newsom, të arrestohej.
Ndërsa qyteti u përball me ditën e katërt të protestave kundër politikave të Trump për emigracionin, demokratët dhe republikanët u përplasën rreth asaj që është bërë pika më e nxehtë në përpjekjet agresive të administratës republikane për të dëbuar emigrantët që ndodhen në vend në mënyrë të paligjshme, shkruan Reuters.
Më herët gjatë ditës, Newsom, i parë si një kandidat i mundshëm demokrat për president në zgjedhjet presidenciale të vitit 2028, u zotua të padisë qeverinë federale për vendosjen e Gardës, duke e quajtur atë të paligjshme.
“Kjo është pikërisht ajo që donte Donald Trump. Ai i hodhi benzinë zjarrit dhe veproi në mënyrë të paligjshme për të federalizuar Gardën Kombëtare,” postoi Newsom në X të hënën.
“Ne po e padisim atë.”
Ligji federal i lejon presidentit të vendosë Gardën nëse kombi pushtohet, nëse ka “rebelim ose rrezik rebelimi”, ose presidenti është “i pamundur që të mbajë rregullin me forcat e rregullta”.
Duke u kthyer në Shtëpinë e Bardhë pas një nate në Camp David, Trump u pyet nga një gazetar nëse shefi i tij kufitar, Tom Homan, duhet ta arrestojë Newsom. Homan ka kërcënuar të arrestojë këdo që pengon përpjekjet e agjencisë së zbatimit të emigracionit, përfshirë guvernatorin.
“Do ta bëja po të isha Tom. Mendoj se është diçka shumë e mirë,” u përgjigj Trump.
“Gavinit i pëlqen publiciteti, por mendoj se do të ishte një gjë e shkëlqyer.”
Rrugët ishin të qeta herët të hënën, pasi protestat shpërthyen të premten, kur agjentët e Emigracionit dhe Doganave të SHBA-së shënjestruan disa vende në qytet për kontrolle si pjesë e përpjekjeve të administratës për të arrestuar emigrantët. Demonstratat vazhduan gjatë fundjavës, duke rezultuar në një reagim të madh policor.
