Pas zjarrit që përfshiu një ditë më parë fushën e mbetjeve urbane në lagjen “24 Maji” në Vlorë, Policia ka nisur hetimet ndaj drejtorit të Ndërmarrjes së Pastrimit dhe katër punonjësve të tjerë të Bashkisë Vlorë, përfshirë edhe përgjegjësin e Bordit të Kullimit.
Sipas njoftimit zyrtar të Policisë, procedimi penal është regjistruar për shtetasit:
F. T., 31 vjeç, me detyrë Drejtor i Ndërmarrjes së Pastrimit
A. S., 36 vjeç, përgjegjës i Bordit të Kullimit
L. D., 56 vjeç, E. D., 27 vjeç dhe D. I., 35 vjeç, të punësuar si manovratorë pranë Bordit të Kullimit në Bashkinë Vlorë.
Hetimi është hapur mbi dyshimet se këta zyrtarë kanë neglizhuar përmbushjen e detyrës, duke mos marrë masa në kohë për të ndërhyrë dhe ndalur përhapjen e zjarrit, i cili shkaktoi ndotje të konsiderueshme mjedisore.
Ngjarja ndodhi më 7 qershor 2025, rreth orës 12:18, në kushte të temperaturave të larta, që besohet se kanë favorizuar përhapjen e flakëve në zonën e grumbullimit të mbetjeve.
Materialet janë referuar Prokurorisë për veprime të mëtejshme, ndërsa hetimet vijojnë për të përcaktuar përgjegjësinë ligjore të secilit prej të proceduarve.
