Qyteti i Gjirokastrës ishte mikpritësi i edicionit të 9-të të Kampionatit Kombëtar të Natural Bodybuilding & Fitness, një aktivitet sportiv që mblodhi në skenë 12 sportistë dhe sportiste nga e gjithë Shqipëria.
Në një atmosferë dinamike dhe motivuese, pjesëmarrësit demonstruan jo vetëm formën e tyre fizike, por edhe përkushtimin ndaj një stili jetese të shëndetshëm dhe të balancuar. Ky kampionat nuk synon vetëm estetikën trupore, por promovon gjithashtu vlera si disiplina, mirëqenia dhe fuqizimi personal.
Ngjarja, që tashmë është kthyer në një traditë të konsoliduar në qytetin historik, ka forcuar pozicionin e Gjirokastrës si një qendër të rëndësishme për aktivitetet sportive dhe kulturore në nivel kombëtar.
