Kryeministri Keir Starmer pohoi se do ketë një rishikim gjithëpërfshirës të ushtrisë britanike, përfshirë një zgjerim të kushtueshëm të mbrojtjes bërthamore të vendit, por nuk pranoi të specifikonte se kur Mbretëria e Bashkuar do përmbushte objektivin kyç për të shpenzuar 3% të prodhimit kombëtar për mbrojtjen.
Mbretëria e Bashkuar do kalojë në një pozicion të “gatishmërisë për luftë” në përgjigje të kërcënimeve në rritje dhe paqëndrueshmërisë së madhe në botë, tha Starmer, pasi qeveria e tij njoftoi planet për të investuar 15 miliardë stërlina (20 miliardë dollarë) në programin e saj të kokave bërthamore dhe për të ndërtuar deri në 12 nëndetëse si pjesë e partneritetit AUK-US që operon me SHBA-në dhe Australinë.
“Nëse doni të frenoni luftërat, atëherë mënyra më e mirë për ta bërë këtë është të përgatiteni për luftë”, tha Starmer për radion BBC të hënën, përpara publikimit të rishikimit strategjik të mbrojtjes së qeverisë të planifikuar për më vonë gjatë ditës.
“Bota ka ndryshuar: ne duhet të jemi gati.”
HMS Artful, një nëndetëse me energji bërthamore, në bazën detare Clyde në Faslane, Skoci, më 4 mars
Rishikimi rrezikon të errësohet nga paqartësia e Starmer-it se kur Britania do i rrisë shpenzimet e mbrojtjes në 3% të prodhimit kombëtar, një objektiv që ende është larg propozimit të Sekretarit të Përgjithshëm të NATO-s Mark Rutte se anëtarët duhet të shpenzojnë të paktën 3.5% për mbrojtjen. Trump ka kërkuar që ata të shpenzojnë 5%.
Starmer nuk ka dhënë një datë të saktë se kur do nisë kjo por në një konferencë për shtyp të hënën theksoi se është “100% i sigurt” se premtimet e përshkruara në rishikimin e së hënës mund të realizohen, sepse ato parashikohen në shpenzimet e mbrojtjes në 2.5% të prodhimit ekonomik.
Investimi i ri bërthamor, për të cilin Sekretari i Mbrojtjes John Healey tha të dielën se do t’i dërgonte një “mesazh Moskës”, vjen së bashku me ndërtimin e gjashtë fabrikave të reja të municioneve për të krijuar një prodhim industrial “gjithmonë aktiv”, duke blerë deri në 7,000 raketa me rreze të gjatë dhe duke investuar në sigurinë kibernetike dhe stoqe të pajisjeve mbështetëse.
Rishikimi i së hënës vjen pas një periudhe investimi të pamjaftueshëm në industrinë e mbrojtjes të vendit që ka parë që madhësia e ushtrisë së Mbretërisë së Bashkuar të zvogëlohet në historikun e saj që nga epoka e Napoleonit.
Sekretari i Mbrojtjes i Mbretërisë së Bashkuar John Healey
Një fund i të ashtuquajturit “dividend paqeje” do ushtrojë më shumë presion mbi financat publike të vendit, me Kancelaren e Thesarit Rachel Reeves që do zbulojë marrëveshjet buxhetore të departamenteve në rishikimin shumëvjeçar të shpenzimeve më 11 qershor. Shpenzimet më të larta ushtarake vijnë në një kohë kërkesash të shumëfishta për xhepin publik, nga kujdesi shëndetësor te burgjet.
“Të gjitha premtimet e rishikimit strategjik të mbrojtjes nga Partia Laburiste do merren me një dozë rezervë, përveç nëse ato mund të tregojnë se do ketë vërtet para të mjaftueshme për t’i paguar ato”, tha Sekretari Konservator i Mbrojtjes në hije, James Cartlidge, në një deklaratë të dielën.
The Sunday Times raportoi se qeveria Laburiste dëshiron të blejë avionë luftarakë të prodhuar në Amerikë, të aftë të mbajnë armë bërthamore taktike. Rishikimi gjithashtu do rekomandojë mburoja të reja mbrojtëse për të mbrojtur vendin nga raketat armike, si dhe rivendosjen e një roje civile vendase, sipas raportit.
Lufta e Rusisë në Ukrainë ka sjellë gjendjen e mbrojtjes evropiane në qendër të vëmendjes vitet e fundit, me Starmer që thotë se Mbretëria e Bashkuar “nuk mund të anashkalojë” kërcënimin e paraqitur nga regjimi i Putinit.
VINI RE: Ky material është pronësi intelektuale e Bloomberg
Përgatiti për Hashtag.al, Klodian Manjani
