Shefi i Mbrojtjes së Gjermanisë, Gjenerali Carsten Breuer, ka paralajmëruar se vendet anëtare të NATO-s duhet të jenë të përgatitura për një sulm të mundshëm nga Rusia brenda katër viteve të ardhshme. Në një intervistë për BBC-në, ai tha se Rusia po ndërton kapacitetet e saj ushtarake në mënyrë të shpejtë dhe të qëllimshme, duke prodhuar rreth 1,500 tanke çdo vit, një pjesë e të cilave nuk po përdoren në Ukrainë, por po ruhen për qëllime të tjera, përfshirë një mundësi të sulmit ndaj shteteve baltike deri në vitin 2029 – ose edhe më herët.
Komentet e tij u bënë gjatë një konference ndërkombëtare për sigurinë në Singapor, ku ai theksoi se kërcënimi nga Rusia është më seriozi që ka parë në 40 vite karrierë ushtarake. Sipas tij, ndërtimi i stokut të armatimeve dhe strukturave të reja ushtarake që shohin nga Perëndimi janë shenja të qarta të përgatitjeve ruse për një përballje të mundshme me NATO-n.
Ai përmendi gjithashtu se Rusia ka prodhuar katër milionë predha artilerie gjatë vitit 2024 dhe ka zhvilluar një sërë sulmesh hibride, përfshirë ndërhyrje në infrastrukturë kritike dhe sulme kibernetike, si pjesë e një strategjie më të gjerë për të testuar mbrojtjen perëndimore. Breuer theksoi se NATO duhet të jetë gati të përgjigjet menjëherë ndaj çdo sulmi të papritur dhe se ndonëse viti 2029 është një pikë referimi për analizat strategjike, nuk ka asnjë garanci që një sulm nuk mund të ndodhë më herët.
Ai përmendi zonën e Suwalkit, në kufi me Lituaninë, Poloninë, Rusinë dhe Bjellorusinë, si një nga pikat më të ndjeshme të aleancës, duke cituar homologët estonezë të cilët e përshkruajnë situatën si të ndodhesh pranë një zjarri të hapur: ndjejnë nxehtësinë, shohin flakët dhe nuhasin tym. Kjo, sipas tij, tregon dallimet në perceptimin e rrezikut ndërmjet vendeve të ndryshme të Europës.
Duke iu përgjigjur shqetësimeve për unitetin e NATO-s, për shkak të qëndrimeve më afër Moskës nga vende si Hungaria dhe Sllovakia, Breuer tha se aleanca mbetet e bashkuar dhe e vetëdijshme për rrezikun që i kanoset. Ai përmendi anëtarësimin e Suedisë dhe Finlandës si sinjal të qartë të forcimit të NATO-s dhe tha se ka një mirëkuptim të plotë për nevojën e forcimit të mbrojtjes kolektive.
Ndërkohë që NATO e rrit ndërgjegjësimin dhe përgatitjet, mbetet sfidë kapaciteti i saj aktual për të përballuar një konflikt të mundshëm, sidomos përballë një makinerie ushtarake ruse që po prodhon në shkallë të gjerë. Ai bëri thirrje për rritje të shpejtë të kapaciteteve mbrojtëse të vendeve anëtare dhe për një mobilizim të përgjithshëm:
“Duhet të ecim përpara, të rrisim kapacitetet dhe të jemi gati të mbrohemi – kjo është mënyra e vetme për të ndërtuar fuqinë parandaluese që na duhet.”
