Elon Musk po largohet nga posti i tij si këshilltar i lartë i Presidentit Donald Trump, pas një periudhe të trazuar në të cilën udhëhoqi përpjekjet për të shkurtuar dhe riorganizuar burokracinë federale.
Largimi i tij, i bërë publik mbrëmjen e së mërkurës, shënon përfundimin e një kapitulli plot sfida, që përfshiu mijëra shkurtime vendesh pune, mbylljen e disa agjencive qeveritare dhe një numër të madh padish. Megjithë pengesat, miliarderi dhe sipërmarrësi Musk përballoi një ambient të vështirë dhe shpesh armiqësor në Uashington, duke arritur më pak nga sa kishte shpresuar në fillim.
Fillimisht, ai kishte synuar të ulte shpenzimet federale me 2 trilionë dollarë, por më vonë ky objektiv u reduktua fillimisht në 1 trilion dhe në fund në vetëm 150 miliardë dollarë. Musk u shpreh gjithnjë e më i zhgënjyer nga rezistenca që hasi ndaj planeve të tij për reformim. Në disa raste, ai pati përplasje të drejtpërdrejta me zyrtarë të tjerë të administratës Trump, të cilët e kundërshtuan ndërhyrjen e tij në strukturat e departamenteve që drejtonin. Përpjekjet e Musk u përballën edhe me një reagim të fortë politik.
Një zyrtar i Shtëpisë së Bardhë, që foli në kushte anonimiteti, konfirmoi largimin e Musk nga roli i tij.
Dorëheqja e Musk erdhi një ditë pasi CBS transmetoi pjesë nga një intervistë ku ai kritikonte boshtin e axhendës legjislative të presidentit, duke deklaruar se ishte “i zhgënjyer” nga ajo që Trump e kishte cilësuar si “projektligji i tij i madh dhe i bukur”./AP
