Autoritetet e Kosovës kanë marrë nën kontroll një ndërtesë pranë liqenit të Ujmanit në veri të vendit, të cilën Serbia pretendon se ishte në përdorim nga Kryqi i Kuq për aktivitete humanitare, përcjell Radio Evropa e Lirë. Ky veprim vjen në kuadër të fushatës së institucioneve të Kosovës për mbylljen e strukturave paralele serbe në territorin e saj.
Zëvendësdrejtori i Policisë për veriun e vendit, Veton Elshani, konfirmoi për mediat lokale se policia ka asistuar në aksionin për marrjen e objektit nën administrimin e autoriteteve kosovare. Objektet e tilla më herët janë mbyllur edhe në Mitrovicë të Veriut, përfshirë qendra kulturore, sportive dhe zyra të Shërbimit Kombëtar të Punësimit.
Reagimet nga Beogradi kanë qenë të ashpra. Petar Petkoviq, drejtori i Zyrës për Kosovën në Qeverinë e Serbisë, e cilësoi aksionin si një goditje ndaj shërbimeve humanitare dhe akuzoi Prishtinën për përshkallëzim të situatës. Edhe Lista Serbe dënoi ndërhyrjen, duke deklaruar se objekti në fjalë përdorej për trajnime në ndihmën e parë dhe strehim të përkohshëm për turistë dhe sportistë.
Ndërkohë, Bashkimi Evropian ka shprehur shqetësim për ndikimin që këto veprime mund të kenë në stabilitetin e rajonit dhe në jetën e përditshme të komuniteteve në veri të Kosovës, duke bërë thirrje për përmbajtje dhe dialog mes palëve.
