Hamas ka propozuar lirimin e disa pengjeve në kuadër të një marrëveshjeje të re për armëpushim në Gaza, pas një vale të re sulmesh izraelite që nisën të shtunën. Bisedimet e reja u zhvilluan në Doha dhe filluan vetëm pak orë pasi ushtria izraelite nisi ofensivën e re të quajtur “Karrocat e Gideonit”.
Një zyrtar palestinez i tha BBC-së se Hamas ka rënë dakord të lirojë nëntë pengje në këmbim të një armëpushimi 60-ditor dhe lirimit të të burgosurve palestinezë nga Izraeli.
Marrëveshja e propozuar parashikon gjithashtu lejimin e hyrjes së 400 kamionëve ndihmash në ditë si dhe evakuimin e pacientëve për trajtim mjekësor jashtë Gazës.
Izraeli, nga ana e tij, ka kërkuar prova se pengjet janë gjallë dhe informacione të detajuara për secilin prej tyre.
Deri tani, nuk ka një reagim publik nga autoritetet izraelite për marrëveshjen e re, por përpara fillimit të bisedimeve ata kishin deklaruar se nuk do të tërhiqnin trupat nga Gaza dhe nuk do të angazhoheshin për përfundimin e luftës — kushte që nuk përfshihen në propozimin aktual.
Ofensiva e re izraelite është një nga më vdekjeprurëset muajt e fundit. Sipas ekipeve të shpëtimit, të paktën 300 persona janë vrarë që nga dita e enjte, përfshirë në spitale dhe kampe refugjatësh në veri dhe jug të Rripit të Gazës. Më shumë se 53,000 njerëz janë vrarë që nga tetori i vitit 2023, sipas ministrisë së shëndetësisë së kontrolluar nga Hamasi në Gaza.
Ndërkohë, bllokada izraelite që ka ndaluar furnizimet me ushqim dhe ndihma të tjera për më shumë se dhjetë javë ka përkeqësuar krizën humanitare.
Agjencitë e ndihmës dhe Kombet e Bashkuara kanë paralajmëruar për rrezikun e urisë së përgjithshme mes popullsisë 2.1 milionëshe të Gazës. Pamje dhe dëshmi të fëmijëve të kequshqyer kanë tronditur opinionin ndërkombëtar.
Presidenti amerikan Donald Trump deklaroi të premten se “shumë njerëz po vdesin nga uria” në Gaza, ndërkohë që Izraeli mohon të ketë mungesë ushqimore në territor.
Kryeministri izraelit Benjamin Netanyahu, më 5 maj, kishte njoftuar se Izraeli do të niste një ofensivë të madhe për të pushtuar pjesë të Gazës dhe për të “shkatërruar” Hamasin, por kjo nuk do të ndodhte pa përfunduar vizita e Trump në Lindjen e Mesme, i cili u largua të premten.
Që nga ajo ditë, banorët e Gazës janë urdhëruar të largohen nga shtëpitë dhe strehat e tyre, megjithëse shumë janë shpërngulur disa herë gjatë luftës.
Në 24 orët e fundit, ushtria izraelite tha se kishte goditur mbi 150 objektiva të Hamasit në të gjithë Gazën.
Ndërkohë, Kombet e Bashkuara dhe liderë evropianë kanë dënuar intensifikimin e ofensivës. Komisioneri i Përgjithshëm i UNRWA-së, Philippe Lazzarini, shprehu tronditjen e tij për situatën, duke pyetur: “Sa jetë palestineze të tjera do të zhduken nga bombardimet, uria apo mungesa e trajtimit mjekësor?”
Sekretari i Përgjithshëm i OKB-së António Guterres, kryeministri spanjoll Pedro Sanchez dhe ministri i jashtëm italian Antonio Tajani kërkuan armëpushim të përhershëm, ndërsa Ministria e Jashtme gjermane paralajmëroi se ofensiva e re do ta përkeqësonte edhe më tej krizën humanitare dhe rrezikonte jetët e pengjeve të mbetura.
Hamasi mban ende 58 pengje të kapur pas sulmit të 7 tetorit 2023, që vrau rreth 1,200 njerëz dhe mori 251 pengje në territorin izraelit.
