Kryeministri Edi Rama, gjatë një konference për shtyp me homologun britanik Keir Starmer, përjashtoi mundësinë që në Shqipëri të ngrihen kampe refugjatësh nga Britania e Madhe, siç ndodh aktualisht në kuadër të marrëveshjes me Italinë.
I pyetur drejtpërdrejt për këtë çështje, Rama u përgjigj me një batutë karakteristike:
“Ne jemi besnikë të martesës me Italinë. Me të tjerët është thjesht dashuri.”
Nga ana e tij, kryeministri britanik Starmer vlerësoi rezultatet e bashkëpunimit me Shqipërinë në uljen drastike të emigracionit të paligjshëm nëpërmjet Kanalit të La Manshit.
“Shifrat tregojnë një ulje prej 94% të shqiptarëve që tentonin kalimin me gomone. Bashkëpunimi ynë ka qenë shumë efektiv,” tha Starmer, duke shtuar se modeli i suksesshëm mund të zgjerohet edhe në vende të tjera të rajonit.
Rama nënvizoi se marrëveshja me Italinë është një model që po testohet dhe nuk është e aplikueshme për të gjitha vendet.
“Për të qenë i sinqertë, edhe vende të tjera na kanë kërkuar marrëveshje të ngjashme, por kemi refuzuar. Jemi besnikë të kësaj ‘martese’ me Italinë,”shtoi ai.
Në konferencë u diskutua gjithashtu edhe për samitin e Procesit të Berlinit, që do të mbahet në Londër në tetor, ku Britania e Madhe do të mirëpresë për herë të parë këtë nismë të BE-së për rajonin. Rama tha se kjo do të jetë një mundësi për të rritur bashkëpunimin ekonomik dhe për të forcuar luftën rajonale kundër emigracionit të paligjshëm dhe krimit të organizuar.
