Zyrtarë të lartë nga Kina dhe Shtetet e Bashkuara janë takuar në Gjenevë për të zhvilluar bisedime tregtare që synojnë “de-përshkallëzimin” e tensioneve mes dy ekonomive më të mëdha të botës, sipas një deklarate zyrtare nga Pekini.
Takimi u zhvillua mes zëvendësministrit të Tregtisë së Kinës, Wang Shouwen, dhe përfaqësuesit të Zyrës së Përfaqësuesit të Tregtisë së SHBA-së, David Meale.
Dy palët diskutuan për “çështje me shqetësim të ndërsjellë në fushën e tregtisë dhe investimeve”, bëri të ditur Ministria kineze e Tregtisë, përcjell The Guardian.
Bisedimet, të zhvilluara në margjinat e Organizatës Botërore të Tregtisë (OBT), vijnë në një moment kur marrëdhëniet tregtare mes dy vendeve kanë mbetur të tensionuara për shkak të tarifave, teknologjisë dhe çështjeve të sigurisë kombëtare.
Pala kineze e përshkroi takimin si “të thelluar, të sinqertë dhe konstruktiv”, dhe tha se të dy vendet ranë dakord të vazhdojnë komunikimin në fushën e tregtisë dhe investimeve.
Ky takim vjen gjithashtu pak javë para se Shtetet e Bashkuara të shqyrtojnë mundësinë e vendosjes së tarifave të reja ndaj disa produkteve kineze, përfshirë automjetet elektrike, bateritë dhe teknologjitë e tjera të avancuara.
Zyrtarët amerikanë nuk kanë komentuar ende publikisht për përmbajtjen e diskutimeve në Gjenevë.
