Bashkimi Evropian po shqyrton vendosjen e tarifave të reja ndaj avionëve dhe makinave të eksportuara nga Shtetet e Bashkuara, në një përpjekje për të detyruar presidentin Donald Trump të tërhiqet nga tarifat ekzistuese dhe ato të propozuara ndaj mallrave evropiane.
Lista e re e mallrave të mundshme për vendosjen e tarifave përfshin avionët e prodhuar nga kompania Boeing, si dhe kategori të tjera eksportesh amerikane si: pajisje elektrike (duke përfshirë kamera), produkte kimike, artikuj për kujdesin shëndetësor dhe disa produkte ushqimore si patatja e ëmbël dhe arrat.
Ndërkohë, Brukseli ka nisur një konsultim me vendet anëtare për mundësinë e nisjes së një padie ndaj SHBA-ve lidhur me tarifën e përgjithshme 20% që Trump njoftoi muajin e kaluar për të gjitha mallrat evropiane, sipas The Guardian.
Këto zhvillime ndodhin vetëm pak orë para se Trump të zbulojë një marrëveshje tarifore me Mbretërinë e Bashkuar dhe disa ditë pasi komisioneri evropian për Tregtinë, Maroš Šefčovič, paralajmëroi se BE nuk do të lejonte një marrëveshje të padrejtë dhe po përgatitej për çdo skenar nëse negociatat tregtare dështojnë.
Këto masa janë shtesë ndaj një liste më të hershme tarifash hakmarrëse në vlerë prej 21 miliardë eurosh të shpallura dhe më pas të pezulluara nga BE muajin e kaluar, ku përfshiheshin taksa për motoçikletat Harley-Davidson, mishin e pulës dhe veshje.
Kompania Boeing, me seli në Seattle, do të goditej rëndë, por gjithashtu do të prekej edhe Irlanda, e cila tashmë është në pritje të tarifave ndëshkuese ndaj eksporteve farmaceutike dhe teknologjisë në SHBA.
Kompania irlandeze Ryanair, që ka porositur 330 avionë Boeing për një vlerë rreth 30 miliardë dollarë, ka paralajmëruar se mund të anulojë porositë dhe të shqyrtojë alternativa të tjera si prodhuesi kinez COMAC. Ndërkohë, edhe kompania më e madhe në botë për qira avionësh, Aercap, ndodhet në Dublin.
Zyrtarët e BE kanë konfirmuar se tarifat e reja, nëse do të zbatohen, do të hyjnë në fuqi në momentin e dorëzimit të avionëve, duke ndikuar kështu edhe porositë ekzistuese.
Megjithatë, ata theksuan se nuk bëhet fjalë për një hakmarrje “dollar për dollar”, por për një përpjekje për të “ribalancuar” marrëdhëniet tregtare, nëse tarifat e Trump do të mbeten në fuqi për një kohë të gjatë.
Po ashtu, Brukseli ka lënë të hapur mundësinë e përfshirjes së shërbimeve në listën e tarifave, çka do të përfshinte kompani të teknologjisë dhe rrjeteve sociale si Microsoft dhe Meta.
“Është ende një opsion që kemi, mund të jetë pjesë e paketës,” tha një burim i lartë nga BE.
Konsultimi me shtetet anëtare do të zgjasë katër javë, deri më 10 qershor, ndërsa vendimi përfundimtar për kategoritë dhe nivelin e tarifave pritet të merret deri në fillim të korrikut – vetëm pak ditë para se të skadojë afati 90-ditor i pauzës që Trump vendosi për tarifën universale 20%.
Zyrtarët evropianë theksuan gjithashtu se nuk është e nevojshme të vendosen tarifa të larta mbi sektorë me volum të lartë tregtar, por mund të vendosen tarifa më të ulëta mbi një gamë më të gjerë produktesh.
“Mund të heqësh të njëjtën sasi uji nga një liqen i cekët ose nga një i thellë,” u shpreh një zyrtar.
Qëllimi i listës së re është të shtojë presionin mbi SHBA-në, pa u paraqitur si hakmarrje direkte, por si një mënyrë për të rishikuar ekuilibrin e marrëdhënieve tregtare.
Ndër kategoritë më të vlefshme në listën e re përfshihen avionët (10.5 miliardë euro eksporte amerikane në 2024), makinat dhe pjesët e tyre (12.5 miliardë euro), pajisjet makinerike (12 miliardë euro), pajisjet elektrike (7.2 miliardë euro) dhe produktet agro-ushqimore (6.4 miliardë euro).
