Izraeli është përfshirë nga një sulm i fuqishëm që u dëgjua mbrëmjen e djeshme pranë Aeroportit Ndërkombëtar Ben Gurion, në Tel Aviv.
Shpërthimi, që u ndie deri në Terminalin 3 të aeroportit, vjen pas një sulmi me raketë balistike të lëshuar nga Jemeni, për të cilin përgjegjësinë e ka marrë grupi rebel Houthi.
Burime të inteligjencës së hapur raportojnë se sistemet mbrojtëse raketore të SHBA-së (THAAD) dhe ato izraelite (Arrow) tentuan të ndërpresin raketën gjatë fluturimit, por dështuan.
Sipas një raportimi nga ‘Open Source Intel (@Osint613)’, Forcat e Mbrojtjes së Izraelit (IDF) kanë konfirmuar zyrtarisht se raketa nuk u ndalua dhe ka arritur të godasë objektivin në afërsi të aeroportit.
Aktualisht, autoritetet izraelite po hetojnë nëse dëmtimet janë shkaktuar nga raketa balistike apo nga mbetjet e një prej ndërprerësve të dështuar.
Njësitë e policisë dhe të çminimit ndodhen në vendngjarje për të kryer hetime dhe për të garantuar sigurinë publike.
Ky incident ngrit alarmin për dështimet e sistemeve të mbrojtjes ajrore në një nga zonat më të mbrojtura të Izraelit.
Ngjarja vjen në një moment tensionesh të larta në rajon dhe pritet të ketë ndikim të menjëhershëm në masat e sigurisë në të gjithë territorin izraelit.
