Autoritetet kiliane kanë shpallur një alarm për cunami dhe kanë bërë thirrje për evakuimin e banorëve përgjatë bregdetit të rajonit jugor të vendit, pas një tërmeti të fuqishëm.
Alarmi u lëshua për rajonin e largët të Magallanes, në skajin jugor të Kilit.
Sipas Shërbimit Gjeologjik të Shteteve të Bashkuara (USGS), një tërmet me magnitudë 7.4 goditi në orën 13:58 me orën lokale të së premtes, rreth 219 kilometra larg brigjeve të qytetit Ushuaia në Argjentinë. Pasgoditje të shumta janë raportuar në rajon.
Presidenti kilian Gabriel Boric, në një postim në platformën X, bëri thirrje për evakuimin e gjithë vijës bregdetare të rajonit Magallanes, duke theksuar se të gjitha burimet shtetërore do të jenë në dispozicion për të përballuar çdo pasojë të mundshme.
Agjencia për Menaxhimin e Fatkeqësive në Kili i ka kërkuar qytetarëve të ruajnë qetësinë dhe të ndjekin udhëzimet e autoriteteve dhe ekipeve të emergjencës.
Sipas mediave lokale, evakuimi po kryhet si një masë paraprake, duke i udhëzuar banorët të zhvendosen në zona të sigurta, të paktën 30 metra mbi nivelin e detit. Më shumë se 1,100 persona janë evakuuar në qytetin Puerto Williams.
Pamjet e publikuara në rrjetet sociale – ende të pa verifikuara nga BBC – tregojnë njerëz duke lënë zonën e rrezikut me qetësi, ndërsa në sfond dëgjohen sirena alarmi.
Tërmeti goditi ngushticën e Drake, midis Kepit Horn dhe Antarktidës, në një thellësi prej 10 kilometrash, sipas USGS. Ndërkohë, instituti kilian i Antarktidës (INAHC) njoftoi për Reuters se po kryhet evakuimi i bazave kërkimore në Antarktidë.
