Mbretëria e Bashkuar do të zhvillojë bisedime me Francën dhe Arabinë Saudite për njohjen e një shteti palestinez në një konferencë që do të mbahet në qershor, ka thënë sekretari i jashtëm britanik, David Lammy për The Guardian. Kjo është hera e parë që MB pranon se po diskuton për një proces njohjeje me Francën.
Njohja e Palestinës nga dy anëtarë të përhershëm të Këshillit të Sigurimit të OKB-së do të ishte një deklaratë e fuqishme, por përballet me shumë pengesa diplomatike. Lammy tha se MB do të preferonte njohjen si pjesë e një procesi që çon në një zgjidhje me dy shtete.
Ai gjithashtu theksoi se çdo zgjidhje afatgjatë do të kërkonte largimin e Hamasit nga qeveria e Gazës dhe një proces demilitarizimi. Lammy shfaqi gjithashtu shqetësimin për zgjerimin e kolonive dhe dhunën e lidhur me to, duke e quajtur këtë një pengesë për një zgjidhje të qëndrueshme.
