Tre shtetas bullgarë me banim në Londër janë shpallur fajtorë për spiunazh në favor të Rusisë, në një nga operacionet më të mëdha dhe më komplekse të inteligjencës së huaj të zbuluara në Mbretërinë e Bashkuar.
Katrin Ivanova, 33 vjeç, Vanya Gaberova, 30 vjeç, dhe Tihomir Ivanchev, 39 vjeç, ishin pjesë e një rrjeti që operonte midis viteve 2020 dhe 2023, duke mbledhur informacione mbi gazetarë investigativë dhe një bazë ushtarake amerikane në Gjermani.
Sipas autoriteteve britanike, rrjeti kishte metoda të sofistikuara dhe përdorte identitete të falsifikuara, survejim të avancuar dhe pajisje teknologjike për të mbledhur informacione.
Policia gjeti në bazën e tyre të operimit në Great Yarmouth një sasi të madhe pajisjesh spiunazhi, përfshirë kamera të fshehura në kravatë dhe gurë të rremë, syze me pajisje regjistrimi dhe dronë të pajisur me teknologji për përgjim të aktivitetit Wi-Fi.
Në total, u sekuestruan 221 telefona celularë, 495 karta SIM dhe 11 dronë, sipas BBC.
Hetimet zbuluan mijëra mesazhe mes anëtarëve të rrjetit, ku përfshiheshin plane për rrëmbim dhe vrasje të disa objektivave.
Një nga taktikat për të futur në kurth personat e synuar ishte përdorimi i metodës “honeytrap”, ku agjentët krijonin lidhje intime për të nxjerrë informacione. Operacionet e tyre përfshinin ndjekjen e gazetarëve investigativë Christo Grozev dhe Roman Dobrokhotov, për të cilët diskutoheshin plane për rrëmbim, djegie të pronave dhe eliminim fizik.
Ata gjithashtu monitoronin një bazë ushtarake amerikane në Stuttgart të Gjermanisë, ku besohej se po trajnoheshin forcat ukrainase.
Rrjeti drejtohej nga Orlin Roussev, 47 vjeç, i cili u rekrutua nga Jan Marsalek, një austriak i kërkuar për mashtrim financiar në skandalin Wirecard dhe i përshkruar nga prokurorët si ndërmjetës për shërbimet sekrete ruse.
Roussev më pas rekrutoi anëtarët e tjerë të rrjetit për të kryer operacionet e spiunazhit. Bashkë me të, edhe Biser Dzhambazov, 43 vjeç, dhe Ivan Stoyanov, 34 vjeç, kishin pranuar fajësinë përpara gjyqit.
Policia Metropolitane e Londrës deklaroi se operacioni për të shkatërruar këtë rrjet ishte një nga më të ndërlikuarit në historinë e shërbimeve të sigurisë britanike.
Autoritetet e konsiderojnë rastin një dëshmi të qartë të përpjekjeve të Kremlinit për të shtrirë ndikimin e tij në Evropë dhe për të eliminuar kundërshtarët politikë e gazetarët investigativë që ekspozojnë aktivitetet e tij.
