Presidenti i SHBA-së, Donald Trump, do të takojë presidentin kinez Xi Jinping në maj gjatë vizitës së tij të parë në Kinë në tetë vjet, një udhëtim i ndjekur nga afër që u shty për shkak të luftës së vazhdueshme me Iranin.
Përpjekja e Trump për të rishikuar datën e udhëtimit pasqyroi dëshirën e presidentit republikan për të projektuar besim në një luftë sfiduese në Lindjen e Mesme dhe, simulantisht, për të menaxhuar një marrëdhënie të tensionuar mes ekonomive më të mëdha të botës.
I planifikuar fillimisht për të udhëtuar javën e ardhshme, Trump tani do të vizitojë Pekinin më 14 dhe 15 maj, tha ai në një postim në Truth Social të mërkurën. Trump shtoi se do të priste Xi-në për një vizitë reciproke në Uashington më vonë këtë vit.
“Përfaqësuesit tanë po finalizojnë përgatitjet për këto Vizita Historike,” tha Trump. “Pres me padurim të kaloj kohë me Presidentin Xi në atë që do të jetë, jam i sigurt, një Ngjarje Monumentale.”
Ambasada e Kinës tha se nuk kishte informacion për të dhënë mbi njoftimin e vizitës. Pekini zakonisht nuk jep detaje mbi axhendën e Xi-së më shumë se disa ditë përpara.
Udhëtimi i planifikuar prej kohësh — dhe përpjekja më e gjerë e Uashingtonit për të rinisur marrëdhëniet në rajonin e Azi-Paqësorit — janë parakaluar vazhdimisht nga ngjarjet.
Në shkurt, Gjykata e Lartë kufizoi pushtetin e presidentit amerikan për të vendosur tarifa, një burim presioni për Trumpin në negociatat me partnerin e tretë më të madh tregtar të SHBA-së. Më vonë atë muaj, operacioni i përbashkët ushtarak i Trump me Izraelin kundër Iranit prezantoi një pikë të re tensioni me Pekinin, blerësin kryesor të naftës së Teheranit.
Udhëtimi i fundit i Trump në Kinë, në vitin 2017, ishte më i fundit nga një president amerikan. Vizita e Trump në maj do të jetë biseda e parë e udhëheqësve personalisht që nga takimi i tetorit në Korenë e Jugut, ku ata ranë dakord për një armëpushim tregtar.
Udhëtimi dyditor pritet të ndërthurë madhështinë dhe ceremonitë pompoze që janë bërë karakteristikë e udhëtimeve të Trump jashtë shtetit me një diplomaci të prerë.
Ndërsa të dyja palët mund të arrijnë marrëveshje vullneti të mirë në Pekin mbi tregtinë e bujqësisë dhe pjesëve të avionëve, ata gjithashtu pritet të diskutojnë fusha të tensionit të thellë si Tajvani, ku pritet pak progres.
Trump ka rritur në mënyrë dramatike shitjet e armëve amerikane në Tajvan gjatë mandatit të tij të dytë në detyrë. Këto lëvizje kanë zemëruar Pekinin, i cili pretendon ishullin e qeverisur në mënyrë demokratike si territorin e vet.
Gjithashtu nuk është e qartë nëse lufta me Iranin, e cila ka tronditur ekonominë globale, do të jetë zgjidhur deri në kohën e takimit Xi-Trump.
Trump ka kërkuar mbështetje nga konsumatorët kryesorë të naftës në botë, përfshirë Kinën, për të ndihmuar në kundërshtimin e përpjekjeve të Iranit për të mbyllur Ngushticën e Hormuzit, shkruan Reuters.
Kërkesa e Trump për asistencë deri më tani është refuzuar kryesisht. Kina, e cila importoi rreth 12 milionë fuçi nafte në ditë gjatë dy muajve të parë të vitit 2026, më së shumti në botë, nuk i është përgjigjur drejtpërdrejt kërkesës së tij.
E pyetur nëse lufta mund të mbyllej në kohë për udhëtimin në Kinë, zëdhënësja e Shtëpisë së Bardhë, Karoline Leavitt, u tha gazetarëve të mërkurën se “ne gjithmonë kemi vlerësuar përafërsisht katër deri në gjashtë javë. Kështu që mund t’i bëni vetë llogaritë.”
Leavitt tha gjithashtu se Trump dhe Xi folën për rishikimin e datës së udhëtimit dhe se Xi i kishte kuptuar arsyet për ta bërë këtë.
“Presidenti Xi e kuptoi se është shumë e rëndësishme që presidenti të jetë këtu gjatë gjithë këtyre operacioneve luftarake që po ndodhin tani,” tha ajo.
