Një zyrtar i OKB-së ka paralajmëruar se Irani mund të godasë infrastrukturën kritike të desalinimit në Lindjen e Mesme brenda pak ditësh, duke rritur tensionet me SHBA-në dhe Izraelin dhe duke rrezikuar pasoja të mëdha ekonomike globale, përcjell Fox News.
Shkencëtari iranian dhe zyrtari i OKB-së, Kaveh Madani, tha se impiantet që prodhojnë ujë të pijshëm nga uji i detit mund të jenë objektiv i sulmeve të reja shumë shpejt, çka mund të çojë në një krizë të gjerë ujore në rajon.
Paralajmërimi vjen pasi presidenti amerikan Donald Trump ka kërcënuar se SHBA do të godasë infrastrukturën energjetike të Iranit nëse nuk hapet Ngushtica e Hormuzit brenda 48 orëve.
Ndërkohë, një zëdhënës i Komandës Qendrore Hazrat Khatam al-Anbiya deklaroi se, nëse infrastruktura e karburantit dhe energjisë e Iranit sulmohet, atëherë do të shënjestrohen infrastruktura energjetike, teknologjia e informacionit dhe impiantet e desalinimit që u përkasin SHBA-së dhe aleatëve të saj në rajon.
Sipas ekspertëve, impiantet e desalinimit janë jetike për furnizimin me ujë në shumë vende të Lindjes së Mesme, pasi rajoni ka mungesë të burimeve natyrore të ujit të pijshëm. Një sulm ndaj tyre mund të shkaktojë pasoja të rënda humanitare dhe ekonomike.
Madani paralajmëroi gjithashtu se dëmtimi i impianteve të trajtimit të ujit, stacioneve të pompimit dhe rrjeteve të shpërndarjes mund të ketë pasoja katastrofike dhe afatgjata, duke ndikuar edhe në tregjet globale të energjisë.
