Besimtarët myslimanë në mbarë Shqipërinë kanë festuar këtë të premte Fitër Bajramin, duke mbushur sheshet kryesore të qyteteve me pjesëmarrje të lartë në faljen e namazit dhe duke përcjellë mesazhe paqeje, solidariteti dhe harmonie.
Atmosfera ka qenë festive në të gjithë vendin, ku pas përfundimit të faljes, besimtarët kanë shkëmbyer urime dhe kanë vijuar traditën e vizitave familjare. Fitër Bajrami, një nga festat më të rëndësishme të fesë islame, shënon përfundimin e muajit të shenjtë të Ramazanit.
Në Durrës, për shkak të numrit të madh të besimtarëve, ceremonia e faljes u zhvillua jo vetëm në ambientet e xhamisë së madhe, por edhe në sheshin “Liria” dhe hapësira të tjera përreth. Falja nisi në orën 06:25 dhe u karakterizua nga pjesëmarrje masive.
Në Fier, besimtarët u mblodhën që në orët e para të mëngjesit në sheshin qendror të qytetit, ku falja nisi në orën 06:30. Myftiu i Fierit, Mikel Hazizolli, përcolli mesazhe për paqe, harmoni dhe angazhim për ndërtimin e një shoqërie më të mirë.
Në Lushnjë, qindra besimtarë u mblodhën në sheshin kryesor të qytetit për faljen e namazit, ndërsa myftiu Gramoz Blliku theksoi rëndësinë e bashkimit dhe vëllazërimit mes njerëzve.
Ndërsa në Pukë, ceremonia kryesore u zhvillua në Xhaminë e Kodër Hanit, ku myftiu Gëzim Kopani u ndal te rëndësia e vazhdimit të veprave të mira edhe pas muajit të Ramazanit. Besimtarët u lutën për paqe, mirësi dhe ndalimin e konflikteve.
Një nga traditat kryesore të kësaj feste mbetet dhënia e sadakasë, si shenjë solidariteti dhe mbështetjeje për ata në nevojë. Pas faljes, familjet shqiptare vijojnë festimet me dreka tradicionale dhe ëmbëlsira, duke ruajtur frymën e bashkimit dhe gëzimit që sjell kjo ditë.
