Presidenti i Shteteve të Bashkuara të Amerikës, Donald Trump, deklaroi se Izraeli “reagoi me zemërim” duke goditur një nga objektet më të mëdha të gazit në Iran, në një zhvillim që shënon përshkallëzim të ndjeshëm të konfliktit në rajon, përcjell Reuters.
Sulmi ndaj fushës së gazit South Pars rriti menjëherë çmimet e naftës në tregjet globale dhe shtoi tensionet në Gjirin Persik, ndërsa Irani reagoi duke lëshuar raketa drejt objektivave në Katar dhe Arabinë Saudite.
Sipas autoriteteve të Katarit, kompania shtetërore QatarEnergy raportoi dëme të konsiderueshme në qytetin industrial Ras Laffan, një nga qendrat më të mëdha të përpunimit të gazit të lëngshëm në botë. Ndërkohë, Arabia Saudite njoftoi se ka neutralizuar disa raketa balistike që synonin kryeqytetin Riad, si dhe një sulm me dron ndaj një objekti gazi në lindje të vendit.
Trump u shpreh se Shtetet e Bashkuara nuk kishin dijeni paraprake për sulmin izraelit dhe theksoi se Katari nuk ishte i përfshirë. Ai paralajmëroi se Izraeli nuk do të ndërmarrë sulme të tjera ndaj kësaj fushe gazi, përveç nëse Irani vijon sulmet ndaj vendeve të Gjirit.
Në një deklaratë të fortë, Trump paralajmëroi se në rast përshkallëzimi të mëtejshëm, SHBA-ja mund të ndërhyjë me forcë të madhe ushtarake, duke synuar plotësisht fushën e gazit South Pars.
Konflikti, që ka nisur prej disa javësh, ka shkaktuar ndërprerje të mëdha në furnizimin global me energji dhe ka rritur ndjeshëm tensionet politike ndërkombëtare. Sipas burimeve amerikane, Uashingtoni po shqyrton dërgimin e mijëra trupave shtesë në Lindjen e Mesme për të garantuar sigurinë e transportit të naftës përmes Ngushticës së Hormuzit, një pikë kyçe për tregtinë globale të energjisë.
Në të njëjtën kohë, ministrat e Jashtëm të 12 vendeve me shumicë myslimane, të mbledhur në Riad, dënuan sulmet e Iranit ndaj vendeve të Gjirit dhe kërkuan ndalimin e menjëhershëm të dhunës. Ata theksuan se goditjet ndaj infrastrukturës civile dhe zonave të banuara janë të pajustifikueshme.
Bilanci i viktimave vijon të rritet. Sipas vlerësimeve të organizatave ndërkombëtare, mbi 3 mijë persona janë vrarë në Iran që nga fillimi i sulmeve, ndërsa qindra të tjerë kanë humbur jetën në Liban, Irak dhe vende të tjera të rajonit. Konflikti ka shkaktuar gjithashtu zhvendosjen e qindra mijëra civilëve dhe rrezikon të thellojë krizën globale të energjisë.
