Greqia planifikon të marrë pjesë në Forcën Ndërkombëtare të Stabilizimit në Gazë, me një batalion special që do të përfshijë mjete të blinduara që do të marrin pjesë në ruajtjen e sigurisë, si dhe mjekë dhe inxhinierë, duke rritur kështu praninë e saj krahasuar me misionin e saj të fundit ndërkombëtar si pjesë e Forcës Ndërkombëtare të Asistencës për Sigurinë në Afganistan (ISAF), nga janari 2002 deri në korrik 2021.
Si pjesë e ISAF-it, kontingjenti grek kishte shpërndarë pajisje mjekësore dhe ndihmë humanitare, kishte ndihmuar në rindërtimin e ndërtisave qeveritare e shkollave, mirëmbajtjen e veprave publike dhe kishte pastruar fushat e minuara.
Tani, me 100-150 personel, batalioni nuk do të jetë me kapacitet të plotë; por roli i sigurisë është një shtim i fundit në plan, në përputhje me dëshirën e qeverisë që Greqia të marrë një pjesë më aktive në menaxhimin e krizave, të paktën në afërsi të saj.
Ekipi i sigurisë do përdorë mjete të blinduara sigurie M1117, lloji i përdorur nga policia ushtarake e SHBA-së.
Forca e Stabilizimit është pjesë e planit të paqes në Gazë të rënë dakord nga Hamasi dhe Izraeli tetorin e kaluar dhe të mandatuar nga Rezoluta 2803 e Këshillit të Sigurimit të Kombeve të Bashkuara më 17 nëntor.
Nuk është përcaktuar ende se kur do të vendoset forca, por dy oficerë grekë janë dërguar tashmë në Koordinimin Civil-Ushtarak të udhëhequr nga SHBA në qytetin jugor izraelit, Kiryat Gat.
Batalioni grek do vendoset brenda perimetrit të sigurisë të krijuar në Gazë nga Forcat Mbrojtëse të Izraelit. Meqenëse ekipi i forcës së sigurisë është i vogël, ai do të operojë si pjesë e një force më të madhe.
Detashmenti grek do të jetë pjesë e një force fillestare prej 8,000 trupash, e udhëhequr nga Komanda Qendrore e SHBA-së (CENTCOM) dhe në të cilën vendet kufitare me Gazën, Egjipti dhe Izraeli, do të luajnë gjithashtu një rol të rëndësishëm.
Forca pritet të zgjerohet së shpejti në 20,000 trupa që operojnë sipas modelit të ISAF-it, por askund afër niveleve të asaj force, e cila arriti në 180,000, shkruan Ekathimerini.
