Të paktën 21 trupa emigrantësh janë zbuluar në një varr masiv në një fermë pranë qytetit Ajdabiya, në Libinë lindore, sipas raportimeve të mediave lokale të enjten. Forcat e sigurisë bastisën fermën pasi morën informacione se emigrantë nga Afrika subsahariane po mbaheshin aty. Varri masiv u gjet rreth 10 kilometra në juglindje të Ajdabiya-s, rreth 160 kilometra nga Bengazi.
Agjencia e Sigurisë së Brendshme në Libinë lindore konfirmoi për televizionin al-Masar se ishte zbuluar “një varr masiv që përmbante trupat e 21 personave të kombësive të ndryshme afrikane”. Një burim sigurie i tha Reuters se në vendngjarje u gjetën burra, gra dhe fëmijë emigrantë me shenja torture, të cilët u dërguan në spital dhe deklaruan se emigrantë të tjerë që kishin qenë me ta ishin zhdukur.
Autoritetet arrestuan pronarin e fermës, i cili pranoi ekzistencën e varrit masiv në pronën e tij. Fotografitë e siguruara nga Reuters tregojnë personel sigurie dhe vullnetarë të Gjysmëhënës së Kuqe duke vendosur trupat në qese plastike të zeza. Shkaqet e vdekjes nuk janë ende të qarta dhe hetimet janë në vijim, shkruan Rt.
Libia, një vend i pasur me naftë dhe destinacion për emigrantë nga vendet afrikane fqinje, është shndërruar në një qendër kryesore tranziti për trafikimin e qenieve njerëzore dhe migrimin drejt Evropës përmes Mesdheut që nga rrëzimi dhe vrasja e Muammar Gaddafit në vitin 2011.
Në shkurt 2025, autoritetet libiane dhe Organizata Ndërkombëtare për Migracionin raportuan zbulimin e dy varreve masive në Libinë juglindore, ku u gjetën trupat e dhjetëra emigrantëve, disa prej të cilëve me plagë nga armët e zjarrit. Në qershor, Zyra e OKB-së për të Drejtat e Njeriut njoftoi se dhjetëra trupa ishin zbuluar në qendra ndalimi në Tripoli dhe bëri thirrje për një hetim të pavarur, duke theksuar se vendet ishin nën kontrollin e Aparatit të Mbështetjes së Stabilizimit (SSA).
