Estonia ka njoftuar se ka ndaluar hyrjen në territorin e saj për 261 shtetas rusë që kanë marrë pjesë në luftën në Ukrainë. Ministria e Brendshme estoneze deklaroi se masa është ndërmarrë për arsye sigurie dhe theksoi se personat që kanë kryer krime në Ukrainë “nuk kanë vend në botën e lirë”, përcjell Euronews.
Sipas autoriteteve estoneze, ndalimi është zbatuar zyrtarisht që javën e kaluar, ndërsa u bë publik nga zyrtarët të hënën në rrjetet sociale. Ministri i Brendshëm, Igor Taro, tha se kërcënimi që paraqesin këta persona “nuk është teorik”, duke shtuar se ata kanë përvojë luftarake, trajnim ushtarak dhe shpesh edhe precedentë kriminalë.
Estonia, e cila ndan kufi me Rusinë, ka kërkuar prej muajsh një ndalim të vizave në nivel evropian për veteranët rusë të luftës në Ukrainë, një ide që ka gjetur mbështetje nga vendet baltike dhe nordike. Ministria vlerëson se deri në 1.5 milionë rusë kanë marrë pjesë në pushtimin në shkallë të gjerë të Ukrainës, rreth gjysma e tyre në vijën e parë të frontit.
“Ky është vetëm fillimi”, shkroi ministri i Jashtëm Markus Tsahkna në platformën X, duke u bërë thirrje edhe vendeve të tjera të ndërmarrin masa të ngjashme. Ndërsa kryeministri Kristen Michal theksoi se garantimi i përgjegjshmërisë për krimet e luftës dhe sigurimi i Evropës janë thelbësore për një paqe të drejtë dhe të qëndrueshme.
Vendimi i Estonisë u përshëndet edhe nga ministri i Jashtëm i Ukrainës, Andrij Sybiga, i cili e cilësoi ndalimin e hyrjes si një “masë të domosdoshme sigurie” dhe një sinjal të qartë se pandëshkueshmëria nuk do të tolerohet.
Ky zhvillim vjen në të njëjtën ditë kur një monitorues i Kombeve të Bashkuara raportoi se viti i kaluar ishte më vdekjeprurësi për civilët në Ukrainë që nga viti 2002. Sipas Misionit të OKB-së për Monitorimin e të Drejtave të Njeriut në Ukrainë, gjatë vitit të kaluar u vranë të paktën 2.514 civilë dhe u plagosën 12.142 të tjerë, një rritje prej 31% krahasuar me vitin 2024 dhe 70% krahasuar me vitin 2023.
Sipas OKB-së, 97% e viktimave të verifikuara në vitin 2025 ndodhën në territor të kontrolluar nga qeveria ukrainase, si pasojë e sulmeve të forcave ruse. Misioni theksoi se rritja e viktimave lidhet jo vetëm me intensifikimin e luftimeve në vijën e frontit, por edhe me përdorimin më të gjerë të armëve me rreze të gjatë, që kanë ekspozuar civilët në të gjithë vendin ndaj rrezikut të shtuar.
