Uragani Erin ka filluar të fuqizohet sërish dhe mund të arrijë kategorinë e tretë ose më lart, ndërsa po lëviz në ujërat e Atlantikut, qindra milje larg brigjeve të SHBA-së. Për shkak të dallgëve gjigante dhe rrymave detare vdekjeprurëse, autoritetet kanë mbyllur plazhet nga rajoni i mid-Atlantikut deri në verilindje, pikërisht kur shumë familje po shfrytëzojnë pushimet e fundit të verës, përcjell Fox News.
Aktualisht, Erin mbetet një uragan i kategorisë 2 me erëra deri në 110 mph (177 km/h), por Qendra Kombëtare e Uraganeve (NHC) paralajmëroi se brenda 24 orëve të ardhshme mund të shndërrohet në një “major hurricane”.
Megjithëse nuk parashikohet të godasë drejtpërdrejt Bregun Lindor, priten pasoja të rënda nga shirat e jashtëm, veçanërisht në Outer Banks të Karolinës së Veriut, ku janë në fuqi paralajmërime për stuhi tropikale dhe rritje të dallgëve.
Tre qarqe në Karolinën e Veriut – Dare, Hyde dhe Currituck – kanë shpallur gjendjen e emergjencës dhe kanë urdhëruar evakuim të detyrueshëm për turistët dhe banorët në zonat bregdetare, përfshirë Ocracoke Island dhe Hatteras Island. Në Currituck, evakuimi i detyrueshëm nisi që në orët e para të së mërkurës.
