Kryeministri izraelit Benjamin Netanyahu ka marrë vendimin për pushtimin e plotë të Rripit të Gazës, përfshirë operacione në zonat ku mbahen pengje, sipas një burimi nga zyra e tij për The Jerusalem Post.
Vendimi i është komunikuar edhe Shefit të Shtabit të Ushtrisë izraelite, gjeneralit Eyal Zamir, i cili është paralajmëruar se “nëse ky plan nuk i përshtatet, atëherë duhet të japë dorëheqjen”.
Ky zhvillim vjen pas muajsh bisedimesh të ndërmjetësuara në Doha midis Hamasit dhe Izraelit, të cilat nuk kanë arritur të sjellin një marrëveshje për armëpushim dhe lirimin e pengjeve.
Ndërkohë, Hamas ka rritur presionin, duke publikuar video të pengjeve izraelite që duken të dobësuar rëndë dhe duke deklaruar se po vuajnë nga uria për shkak të “krizës humanitare të përhapur” në Gaza. Në të njëjtën kohë, grupi kërkon që qindra kamionë ndihmash të lejohen të hyjnë në territor për të rifilluar negociatat.
Përpjekjet ndërkombëtare për të dërguar ndihma drejt civilëve palestinezë, duke anashkaluar Hamasin, kanë hasur në rezistencën e grupit. Hamas ka deklaruar se nuk do të lejojë që ndihmat të arrijnë te pengjet, përveç nëse Izraeli hap korridoret humanitare në mënyrë të përhershme dhe ndalon “çdo formë të trafikut ajror” gjatë shpërndarjes së ndihmave.
Situata në terren vazhdon të jetë tejet e tensionuar, ndërsa Izraeli përgatitet për një ofensivë të re ushtarake në të gjithë Gazën, në një moment ku çështja e pengjeve dhe ajo humanitare mbeten të ndërthurura dhe tepër të ndjeshme politikisht dhe moralisht.
