Të paktën 24 persona kanë humbur jetën dhe dhjetëra të tjerë raportohen të zhdukur pas përmbytjeve të fuqishme që goditën zonën e Teksasit Qendror, veçanërisht përgjatë lumit Guadalupe, në fundjavën e Ditës së Pavarësisë së SHBA-së (4 Korrik).
Mes të zhdukurve janë edhe 23 deri në 25 vajza nga kampi veror Camp Mystic, që ndodhej pranë zonës së përmbytur. Ekipet e kërkim-shpëtimit janë angazhuar me helikopterë, mjete lundruese dhe qindra forca për të kërkuar personat e zhdukur, përcjell Guardian.
Shkaku i përmbytjeve besohet të jetë një sistem i fuqishëm stuhish, që solli rreshje të dendura—mbi 25 centimetra shi për pak orë—në një tokë të tharë, duke shkaktuar rrjedhje të menjëhershme dhe përmbytje të furishme.
“Është një tragjedi e paprecedent. Jemi në fazë kërkimi dhe vlerësimi të dëmeve,” u shpreh një zyrtar i mbrojtjes civile lokale.
Autoritetet lokale në qarkun Kerr dhe zona të tjera përreth kanë shpallur gjendje emergjente për përmbytje të menjëhershme (“flash flood emergency”), ndërsa festimet për 4 Korrikun janë anuluar në qytete si Kerrville, Austin dhe Boerne.
Presidenti amerikan Donald Trump ka reaguar duke premtuar ndihmë të menjëhershme federale për autoritetet lokale dhe familjet e prekura.
Dëmet infrastrukturore janë gjithashtu të mëdha: rrugë të shkatërruara, ura të dëmtuara dhe ndërprerje të energjisë në disa zona.
Shërbimi Kombëtar i Motit paralajmëron për reshje të tjera në ditët në vijim dhe u bën thirrje qytetarëve të shmangin udhëtimet dhe të ndjekin udhëzimet e emergjencës.
