![\"\"](\"https:\/\/hashtag.al\/wp-content\/uploads\/2021\/02\/sashailic.jpg\")
<\/p>\n<\/p>\n
Koh\u00eb m\u00eb par\u00eb nj\u00eb gjykat\u00eb n\u00eb Beograd hodhi posht\u00eb si t\u00eb pabaz\u00eb padin\u00eb e K\u00ebshillit Komb\u00ebtar t\u00eb Shqiptar\u00ebve nga Lugina e Preshev\u00ebs kund\u00ebr ministrit serb t\u00eb Mbrojtjes Aleksandar Vulin p\u00ebr p\u00ebrdorimin n\u00ebn\u00e7mues t\u00eb emrit t\u00eb shqiptar\u00ebve. N\u00eb vazhdim, KDP-ja sjell v\u00ebshtrimin e shkrimtarit Sasha Iliq n\u00eb t\u00eb cilin ai\u00a0 thot\u00eb se vendimi i gjykat\u00ebs n\u00ebnkupton diskriminimin e hapur t\u00eb minoritetit shqiptar n\u00eb Serbi.<\/em><\/span><\/p>\n Shkruan: Sasha ILIQ\/Beograd<\/strong><\/span><\/p>\n N\u00ebse k\u00ebpuc\u00ebt sportive jan\u00eb nga shit\u00ebs ambulant\u00eb, at\u00ebher\u00eb ato n\u00eb trendin urban thirren \u201eshiptarka\u201c. N\u00ebse dikush \u00ebsht\u00eb i sh\u00ebmtuar, at\u00ebher\u00eb ai ka \u2018fytyr\u00eb shiptari\u2019. N\u00ebse \u00ebsht\u00eb refugjat nga Kosova at\u00ebher\u00eb ai \u00ebsht\u00eb \u2018shiptar\u2019. N\u00ebse profesori n\u00eb shkoll\u00eb mban\u00eb ligj\u00ebrat\u00eb p\u00ebr toleranc\u00ebn, at\u00ebher\u00eb ai merr nofk\u00ebn \u2018shiptar\u2019. <\/span><\/p>\n N\u00ebqoft\u00ebse dikush kritikon pushtetin, at\u00ebher\u00eb ai \u00ebsht\u00eb armik i Serbis\u00eb dhe detyrimisht \u2018shiptar\u2019. Kur dikush flet n\u00eb dialektin kosovaro-resavian, p\u00ebr t\u00eb thuhet se ka \u2018theks shiptar\u2019. Kur nj\u00eb grup i tifoz\u00ebve nga Beogradi nis q\u00ebrimin e hesapeve me grupin tjet\u00ebr, thon\u00eb se po shkojn\u00eb q\u00eb t\u2019i \u2018\u00e7\u2019jerrin shiptar\u00ebt\u2019. <\/span><\/p>\n Po qe se shp\u00ebrthen ndonj\u00eb protest\u00eb e ndonj\u00eb pakice pa t\u00eb drejta, thuhet se ka ndodhur \u2018shiptarizimi i atij vendi\u2019. Kur Aleksandar Vulin, si minist\u00ebr i Ushtris\u00eb gjat\u00eb vitit 2019 deklaroi se angazhohet p\u00ebr \u2018kufizimin sa m\u00eb t\u00eb shpejt\u00eb dhe m\u00eb t\u00eb sigurt me shiptar\u00ebt\u2019, at\u00ebher\u00eb ai nuk mendon asgj\u00eb t\u00eb mir\u00eb p\u00ebr fqinj\u00ebt shqiptar\u00eb n\u00eb Kosov\u00eb.<\/span><\/p>\n P\u00ebrkundrazi, deklarata e tij mb\u00ebshtetet pik\u00ebrisht n\u00eb tradit\u00ebn e gjat\u00eb t\u00eb p\u00ebrdorimit pezhorativ\u00a0 t\u00eb etnonimit q\u00eb n\u00eb gjuh\u00ebn serbe mori nj\u00eb shkall\u00eb t\u00eb t\u00ebr\u00eb t\u00eb dometh\u00ebnieve shprehimisht negative dhe nuk ka kurrfar\u00eb lidhjeje me fjal\u00ebn \u2018shqiptar\u2019 t\u00eb cil\u00ebn e shfryt\u00ebzojn\u00eb vet shqiptar\u00ebt. Prandaj, kur Vulin thot\u00eb \u2018shiptar\u2019, dhe kur ministrja kosovare e Pun\u00ebve t\u00eb Jashtme, Meliza Haradinaj \u2013Stublla thot\u00eb \u2018shqiptar\u2019, kjo nuk \u00ebsht\u00eb e nj\u00ebjta gj\u00eb. <\/span><\/p>\n K\u00ebt\u00eb e din fare mir\u00eb edhe ministri Vulin i cili tetorin e vitit t\u00eb kaluar e quajti q\u00ebllimisht \u2018shiptare\u2019 ministren kosovare. Gjat\u00eb po atij muaji ministri Vulin pati nj\u00eb vist\u00ebr paraqitjesh raciste, sepse ky term n\u00eb gjuh\u00ebn serbe dehumanizon entitetin i cili mish\u00ebrohet me t\u00eb. <\/span><\/p>\n N\u00eb munges\u00eb t\u00eb politik\u00ebs, dialogut dhe t\u00eb p\u00ebrgjigjeve t\u00eb q\u00eblluara, politikan\u00ebt serb\u00eb shum\u00eb kollaj i rreken k\u00ebtij lloji t\u00eb diskriminimit t\u00eb bashk\u00ebbiseduesve shqiptar\u00eb. K\u00ebt\u00eb e b\u00ebjn\u00eb ve\u00e7mas ata politikan\u00eb t\u00eb cil\u00ebt kan\u00eb qen\u00eb ose vazhdojn\u00eb t\u00eb jen\u00eb t\u00eb ngarkuar p\u00ebr koordinimin e marr\u00ebdh\u00ebnieve me Kosov\u00ebn. <\/span><\/p>\n Marko Gjuriq, ambasadori aktual i Serbis\u00eb n\u00eb SHBA, ka shfryt\u00ebzuar k\u00ebt\u00eb term t\u00eb sh\u00ebmtuar n\u00eb deklaratat e veta zyrtare p\u00ebrderisa drejtonte Kancelarin\u00eb p\u00ebr Kosov\u00ebn dhe Metohin\u00eb, n\u00eb ball\u00eb t\u00eb s\u00eb cil\u00ebs m\u00eb par\u00eb ishte Aleksandar Vulin.<\/span><\/p>\n P\u00ebr shkak t\u00eb sjelljes s\u00eb k\u00ebtill\u00eb t\u00eb Vulinit dhe p\u00ebrdorimit t\u00eb fjalorit t\u00eb urrejtjes n\u00eb komunikimin zyrtar me politikan\u00ebt shqiptar\u00eb, Kryetari i K\u00ebshillit Komb\u00ebtar t\u00eb Shiptar\u00ebve, Ragmi Mustafa, paraqiti padi kund\u00ebr tij n\u00eb qershor t\u00eb vitit 2019. \u2018Respektimi i pakicave \u00ebsht\u00eb detyrim edhe ligjor edhe kushtetues i Qeveris\u00eb, kurse respektimi dhe pranimi i tjetrit \u00ebsht\u00eb parakusht p\u00ebr nj\u00eb shoq\u00ebri demokratike.\u00a0 <\/span><\/p>\n N\u00eb nj\u00eb qeveri demokratike dhe n\u00eb nj\u00eb shtet demokratik, \u00e7do minist\u00ebr q\u00eb n\u00eb publik ofendon pareshtur pakicat, do t\u00eb duhej q\u00eb t\u00eb pakt\u00ebn t\u00eb shkarkohet. Shqiptar\u00ebt nuk jan\u00eb fajtor\u00eb q\u00eb Qeveria e Serbis\u00eb nuk posedon kapacitete demokratike,\u2019- ka th\u00ebn\u00eb Mustafa me k\u00ebt\u00eb rast. <\/span><\/p>\n Doli q\u00eb ky konstatim p\u00ebr munges\u00eb t\u00eb kapacitetit demokratik ta godas\u00eb esenc\u00ebn e q\u00ebndrimit t\u00eb politik\u00ebs s\u00eb Vu\u00e7iqit ndaj shqiptar\u00ebve t\u00eb Kosov\u00ebs, por edhe n\u00eb Preshev\u00eb. S\u00eb shpejti do t\u00eb mbushen n\u00ebnt\u00eb vjet nga marrja p\u00ebrsip\u00ebr e p\u00ebrgjegj\u00ebsis\u00eb p\u00ebr zbatimin e procesit t\u00eb normalizimit nd\u00ebrmjet Serbis\u00eb dhe Kosov\u00ebs, por nga e gjith\u00eb kjo nuk doli asgj\u00eb, p\u00ebrve\u00e7 se urrejtja u shtua deri n\u00eb mas\u00ebn sa ministrat t\u00eb cil\u00ebt ofendojn\u00eb shqiptar\u00ebt bot\u00ebrisht, jo vet\u00ebm q\u00eb nuk sanksionohen, por edhe para gjykat\u00ebs \u2013 falen. <\/span><\/p>\n Her\u00ebn e fundit kur nj\u00eb padi e k\u00ebtill\u00eb u gjet para ndonj\u00eb gjykate n\u00eb Serbi\u00a0 ishte nga fillimi i vitit 2017, kur pas padis\u00eb s\u00eb Iniciativ\u00ebs s\u00eb t\u00eb Rinjve p\u00ebr t\u00eb Drejtat e Njeriut kund\u00ebr Informerit, Gjykata e Apelit n\u00eb Beograd nxori aktgjykimin q\u00eb \u2018termi \u2018shiptar\u2019 p\u00ebr pjes\u00ebtar\u00ebt e nacionalitetit shqiptar t\u00eb cil\u00ebt jetojn\u00eb n\u00eb Kosov\u00eb e Metohi n\u00eb gjuh\u00ebn serbe t\u00eb konsiderohet p\u00ebrmbajtje politikisht jokorrekte dhe ofenduese\u2019. <\/span><\/p>\n N\u00eb fakt, \u2018shiptari\u2019 n\u00eb diskursin e medias dhe t\u00eb politikan\u00ebve vendor\u00eb ishte trajtuar deri tani si gjuh\u00eb e urrejtjes, por para dy dit\u00ebsh\u00a0 m\u00eb nuk \u00ebsht\u00eb k\u00ebshtu, pasi Gjykata e Lart\u00eb n\u00eb Beograd hodhi posht\u00eb si t\u00eb pabaz\u00eb padin\u00eb e K\u00ebshillit Komb\u00ebtar t\u00eb Shqiptar\u00ebve kund\u00ebr ministrit Aleksandar Vulin.<\/span><\/p>\n Nj\u00eb epilog i k\u00ebtill\u00eb i procesit gjyq\u00ebsor prodhoi entuziaz\u00ebm t\u00eb p\u00ebrgjithsh\u00ebm n\u00eb L\u00ebvizjen e Socialist\u00ebve q\u00eb doli menj\u00ebher\u00eb me kumtes\u00ebn e cila vet\u00ebvetiu ng\u00ebrthen diskriminimin dhe degradimin e pjes\u00ebtar\u00ebve t\u00eb pakic\u00ebs shqiptare n\u00eb Serbi. N\u00ebn titullin \u2018Fitore e madhe e gjuh\u00ebs serbe dhe e arsyes s\u00eb sh\u00ebndosh\u00eb\u2019 Partia e Vulinit porosi si vijon: \u2018Sikur Ragmi Mustafa nga K\u00ebshilli Komb\u00ebtar i Shqiptar\u00ebve n\u00eb Serbi ta dinte m\u00eb mir\u00eb gjuh\u00ebn serbe dhe historin\u00eb e popullit serb, at\u00ebher\u00eb kurr\u00eb nuk do t\u2019i shkonte nd\u00ebrmend\u00a0 t\u00eb padis\u00eb Aleksandar Vulinin p\u00ebr p\u00ebrdorimin e fjal\u00ebs \u2018shiptar\u2019, fjal\u00eb kjo q\u00eb vjen nga gjuha e tij dhe me t\u00eb cil\u00ebn edhe vet ai ashtu e quan veten\u2019. <\/span><\/p>\n Me kanosjen q\u00eb nuk fshehet: \u2018Sikur Shaip Kamberi, i cili merr pag\u00eb deputeti nga qytetar\u00ebt e Serbis\u00eb, ta vler\u00ebsonte dhe respektonte m\u00eb shum\u00eb vendin q\u00eb i ka dh\u00ebn\u00eb gjith\u00e7ka n\u00eb jet\u00eb, nuk do t\u2019ju b\u00ebnte thirrje t\u00eb jasht\u00ebligjshme t\u00eb huajve t\u00eb ushtrojn\u00eb presion mbi jurisprudenc\u00ebn serbe p\u00ebr shkak se po gjykon sipas ligjit dhe pse nuk e ka d\u00ebnuar Vulinin p\u00ebr shkak se flet gjuh\u00ebn serbe\u2019<\/span><\/p>\n Pra, fjala \u00ebsht\u00eb p\u00ebr nj\u00eb diskrimin t\u00eb hapur t\u00eb minoritetit shqiptar n\u00eb Serbi q\u00eb \u00ebsht\u00eb legjitimuar edhe nga gjykata. Pas \u2018mbrojtjes s\u00eb gjuh\u00ebs serbe\u2019 nga ana e Vulinit, \u00e7do individ, grup ose bashk\u00ebsi mund t\u00eb sh\u00ebrbehet me fjalorin e urrejtjes ndaj minoriteteve pa frik\u00eb se ka p\u00ebr t\u2019u sanksionuar. <\/span><\/p>\n P\u00ebr Aleksandar Vu\u00e7iqin dhe Ana B\u00ebrnabiqin ky nuk \u00ebsht\u00eb kurfar\u00eb problemi pasi edhe vet marrin pjes\u00eb n\u00eb k\u00ebt\u00eb p\u00ebr\u00e7mim kolektiv t\u00eb shqiptar\u00ebve. Ata gjith\u00ebsesi q\u00eb q\u00ebndrojn\u00eb prapa mir\u00ebkuptimit t\u00eb thell\u00eb p\u00ebr \u2018gjuh\u00ebn dhe kultur\u00ebn serbe\u2019, ashtu sikund\u00ebr i kupton Aleksandar Vulini i cili u g\u00ebzua fuqish\u00ebm kur d\u00ebgjoi p\u00ebr padin\u00eb e Ragmi Mustaf\u00ebs: \u2018Ky \u00ebsht\u00eb kompliment p\u00ebr luft\u00ebn time konsekuente dhe t\u00eb vendosur p\u00ebr t\u00eb v\u00ebrtet\u00ebn\u2019, tha me k\u00ebt\u00eb rast ministri Vulin duke theksuar se ky \u00ebsht\u00eb q\u00ebndrim vet\u00ebm i tij e jo q\u00ebndrim i Qeveris\u00eb e as i presidentit Vu\u00e7iq.<\/span><\/p>\n Mir\u00ebpo, fjala k\u00ebmb\u00ebngul\u00ebse diskriminuese e nj\u00eb ministri nuk mund t\u00eb jet\u00eb rast i izoluar e as q\u00eb mund t\u00eb trajtohet si fjal\u00eb e qytetarit Aleksandar Vulin, sepse \u00ebsht\u00eb p\u00ebrdorur p\u00ebrderisa po e kryente detyr\u00ebn e ministrit t\u00eb Mbrojtjes t\u00eb Republik\u00ebs s\u00eb Serbis\u00eb.<\/span><\/p>\n Po ashtu, kumtesa e L\u00ebvizjes s\u00eb Socialist\u00ebve pas \u2018fitores\u2019 s\u00eb Vulinit zbulon nj\u00eb form\u00eb t\u00eb thell\u00eb t\u00eb diskriminimit, sepse afirmon tez\u00ebn se gjithkush q\u00eb \u00ebsht\u00eb n\u00ebn jurisdiksionin e republik\u00ebs, qoft\u00eb pakic\u00eb ose jo, e ka p\u00ebr borxh t\u00eb duroj\u00eb terrorin verbal e \u00e7do tjet\u00ebr t\u00eb shumic\u00ebs, t\u00eb stereotipeve t\u00eb nd\u00ebrthurura t\u00eb falimit t\u00eb rrug\u00ebs q\u00eb ngritet n\u00eb nivelin e oratoris\u00eb m\u00eb t\u00eb lart\u00eb t\u00eb politik\u00ebs. <\/span><\/p>\n Prandaj ata u b\u00ebjn\u00eb thirrje politikan\u00ebve shqiptar\u00eb q\u00eb \u2018ta m\u00ebsojn\u00eb m\u00eb mir\u00eb serbishten\u2019 dhe t\u00eb manifestojn\u00eb respekt m\u00eb t\u00eb madh ndaj \u2018vendit q\u00eb u ka dh\u00ebn\u00eb gjith\u00e7ka n\u00eb k\u00ebt\u00eb jet\u00eb\u2019. Kjo dometh\u00ebn\u00eb se ofendimet dhe p\u00ebr\u00e7mimet n\u00ebnkuptohen dhe se nuk mund t\u00eb mbroheni nga gjykatat e vendit prej p\u00ebrfaq\u00ebsuesve t\u00eb pushtetit t\u00eb cil\u00ebt mund t\u2019ju trajtojn\u00eb ashtu sikurse t\u2019ju teket.<\/span><\/p>\n Mir\u00ebpo, padia q\u00eb erdhi nga K\u00ebshilli Komb\u00ebtar i Shqiptar\u00ebve, ndon\u00ebse u kualifikua e pabaz\u00eb, flet p\u00ebr di\u00e7ka t\u00eb kund\u00ebrt. Ajo \u00ebsht\u00eb shenj\u00eb se shqiptar\u00ebt n\u00eb Serbi, si edhe pakicat e tjera, e din\u00eb fort mir\u00eb edhe gjuh\u00ebn dhe kultur\u00ebn serbe, si at\u00eb zyrtare ashtu edhe at\u00eb jozyrtare, t\u00eb rrug\u00ebs, t\u00eb tifoz\u00ebve, q\u00eb \u00ebsht\u00eb b\u00ebr\u00eb pjes\u00eb e kultur\u00ebs politike t\u00eb pushtetit t\u00eb Vu\u00e7iqit. <\/span><\/p>\n N\u00eb nj\u00eb ambient t\u00eb k\u00ebtill\u00eb t\u00eb \u2018arsyes s\u00eb sh\u00ebndosh\u00eb\u2019 t\u00eb Vulinit, jan\u00eb t\u00eb pakta gjas\u00ebt p\u00ebr dialog, kurse gati e pamundur p\u00ebr \u00e7far\u00ebdo lloji t\u00eb normalizimit politik.<\/span><\/p>\n