{"id":402600,"date":"2020-09-29T16:08:03","date_gmt":"2020-09-29T14:08:03","guid":{"rendered":"https:\/\/hashtag.al\/?p=402600"},"modified":"2020-09-29T16:12:57","modified_gmt":"2020-09-29T14:12:57","slug":"vrasja-e-azem-hajdarit-rrefimi-i-plote-i-sali-berishes-ne-12-pjese","status":"publish","type":"post","link":"https:\/\/www.hashtag.al\/index.php\/2020\/09\/29\/vrasja-e-azem-hajdarit-rrefimi-i-plote-i-sali-berishes-ne-12-pjese\/","title":{"rendered":"Vrasja e Azem Hajdarit, rr\u00ebfimi i plot\u00eb i Sali Berish\u00ebs n\u00eb 12 pjes\u00eb (Video)","gt_translate_keys":[{"key":"rendered","format":"text"}]},"content":{"rendered":"

\"\"<\/p>\n

Mbr\u00ebmjen e djeshme, gazetari Blendi Fevziu, riktheu n\u00eb \u2018Opinion\u2019 \u00e7\u00ebshtjen e vrasjes s\u00eb Azem Hajdarit, pran\u00eb selis\u00eb s\u00eb PD-s\u00eb n\u00eb dat\u00ebn 12 shtator 1998. <\/span><\/p>\n

I ftuar p\u00ebr t\u00eb folur p\u00ebr ngjarjen ishte edhe ish-kryeministri Berisha, i cili dha nj\u00eb d\u00ebshmi prej rreth 30 minutash mbi at\u00eb q\u00eb ai e ka quajtur edhe m\u00eb her\u00ebt \u2018Krimi i Shekullit\u2019 i ndodhur n\u00eb Shqip\u00ebri. <\/span><\/p>\n

N\u00eb rr\u00ebfimin e tij, i pyetur nga gazetari, Berisha tregoi gjith\u00e7ka kishte ndodhur para, gjat\u00eb dhe pas krimit t\u00eb r\u00ebnd\u00eb, duke hedhur akuza t\u00eb drejtp\u00ebrdrejta n\u00eb drejtim t\u00eb shtetit t\u00eb asaj kohe si porosit\u00ebsin dhe organizatorin e ekzekutimit t\u00eb Hajdarit, mes t\u00eb cil\u00ebve p\u00ebrmendi me em\u00ebr ish-kreun e Sh\u00ebrbimit Informativ, Fatos Klosi. <\/span><\/p>\n

Po k\u00ebshtu ai pohoi se ekzekutor\u00ebt e Azen Hajdarit u vran\u00eb nga shteti me an\u00eb kombinimesh t\u00eb ndryshme, duke p\u00ebrfshir\u00eb familjet e viktimave t\u00eb Haklajve. <\/span><\/p>\n

Gjat\u00eb rr\u00ebfimit t\u00eb tij, t\u00eb ndar\u00eb n\u00eb 12 pjes\u00eb, ish-kryeministri pohoi se nuk ishte thirrur asnj\u00ebher\u00eb n\u00eb prokurori apo gjykat\u00eb p\u00ebr t\u00eb d\u00ebshmuar lidhur me ngjarjen. <\/span><\/p>\n

Ai l\u00ebshoi akuza n\u00eb drejtim t\u00eb familjes Haklaj n\u00eb Tropoj\u00eb, t\u00eb cil\u00ebt e akuzoi si bande terroriste shtet\u00ebrore. <\/span><\/p>\n

Nd\u00ebr t\u00eb tjera, Berisha rr\u00ebfeu marr\u00ebdh\u00ebnien e tij m\u00eb Azem Hajdarin, telefonat\u00ebn q\u00eb e kishte nxjerr\u00eb Hajdarin jasht\u00eb selis\u00eb s\u00eb PD-s\u00eb dhe d\u00ebshmin\u00eb e simpatizant\u00ebve demokrat\u00eb lidhur me vrasjen. <\/span><\/p>\n

N\u00eb fund, ish-kreu i PD-s\u00eb, tha se rihapja e procesit \u00ebsht\u00eb veprim politik q\u00eb ka t\u00eb b\u00ebj\u00eb me zotimin e kryeministrit Rama p\u00ebr t\u00eb liruar nga burgu Jaho Salihin, nj\u00eb nga personat q\u00eb \u00ebsht\u00eb d\u00ebnuar si bashk\u00ebpun\u00ebtor n\u00eb vrasjen e Azem Hajdarit dhe \u00ebsht\u00eb d\u00ebnuar me burg p\u00ebrjet\u00eb.<\/span><\/p>\n

Azem Hajdari u vra mbr\u00ebmjen e 12 shtator 1998. Salihi \u00ebsht\u00eb i vetmi person i gjall\u00eb q\u00eb ka qen\u00eb i pranish\u00ebm n\u00eb vendin e ngjarjes kur \u00ebsht\u00eb vrar\u00eb Hajdari. Fatmir Haklaj u vra n\u00eb nj\u00eb atentat mbr\u00ebmjen e 4 n\u00ebntorit 1999 nd\u00ebrsa Naim \u00c7angu \u00ebsht\u00eb vrar\u00eb aksidentalisht nga Haklaj, mbr\u00ebmjen e ekzekutimit t\u00eb Azem Hajdarit.<\/span><\/p>\n

Rr\u00ebfimi i Berish\u00ebs n\u00eb 12 pjes\u00eb<\/strong><\/span><\/p>\n

Berisha p\u00ebr gjykat\u00ebn<\/strong><\/span><\/p>\n

Nuk jam thirrur n\u00eb m\u00ebnyr\u00eb absolute asnj\u00ebher\u00eb, kurr\u00eb ne jet\u00ebn time, as n\u00eb gjykat\u00eb as n\u00eb prokurori. Nuk kam marr\u00eb asnj\u00ebher\u00eb asnj\u00eb flet\u00ebthirrje. Fatos Klosi dhe ish-bashk\u00ebpun\u00ebtori i Sigurimit t\u00eb Shtetit, Arben Rakipi, b\u00ebnin loj\u00eb se th\u00ebrrisnin por s\u2019m\u00eb th\u00ebrrisnin dot p\u00ebr dy fakte. E para un\u00eb do u b\u00ebja pretenc\u00eb politike. E dyta un\u00eb nuk isha d\u00ebshmitar okular. S\u00eb treti, vet\u00ebm n\u00eb harkun kohor 12 or\u00eb un\u00eb kam b\u00ebr\u00eb tre konferenca shtypi. Kam denoncuar publikisht \u00e7do t\u00eb dh\u00ebn\u00eb q\u00eb ka ardh, kam denoncuar publikisht vrasjen shtet\u00ebrore.<\/span><\/p>\n

Berisha p\u00ebr Haklajt<\/strong><\/span><\/p>\n

\u00c7far\u00eb ishte banda terroriste Haklaj. Ishte ajo nj\u00eb band\u00eb kriminale e zakonshme?. Jo. Ajo ishte nj\u00eb band\u00eb shtet\u00ebrore, me spaleta. Kapiten, major, n\u00ebn Kolonel. Band\u00eb ishte edhe Zani \u00c7aushi, po ai nuk u b\u00eb shef komisariati. Band\u00eb ishte edhe Gjolek\u00eb Malaj po s\u2019u b\u00eb shef komisariati. Vras\u00ebsit Haklaj mor\u00ebn komisariatin vet\u00ebm e vet\u00ebm p\u00ebr t\u2019u hakmarr\u00eb n\u00eb em\u00ebr t\u00eb regjimit q\u00eb u p\u00ebrmbys me Tropoj\u00ebn e Azem Hajdarin e t\u00eb tjer\u00eb. E vrau shteti Azem Hajdarin.<\/span><\/em><\/p>\n

Berisha p\u00ebr Fatos Nanon<\/strong><\/span><\/p>\n

S\u00eb pari ne kemi patur nj\u00eb informacion se vras\u00ebsit e Azem Hajdarit at\u00eb dit\u00eb n\u00eb drek\u00eb kan\u00eb pritur n\u00eb aeroport Fatos Nanon. A akuzova Fatos Nanon sepse pas vrasjes ne i kemi ndjekur me deg\u00ebt tona vras\u00ebsit e band\u00ebs terroriste. Nga Lapraka deri n\u00eb Bajram Curri asnj\u00eb postbllok policie, jo vet\u00ebm s\u2019i ka ndaluar por i ka nderuar. Na u tha se jan\u00eb njoftuar t\u00eb gjitha postblloqet q\u00eb t\u2019i ndaloj\u00eb. Nano nuk veproi. U formuluan akuza p\u00ebr Krime kund\u00ebr Njer\u00ebzimit ndaj gjasht\u00eb drejtuesve t\u00eb PD-s\u00eb. Fatos Nano tha ose faktohen k\u00ebto akuza ose un\u00eb jap dor\u00ebheqjen. Historia m\u00eb von\u00eb tregoi, n\u00eb vler\u00ebsimin tim se ai nuk ishte personi i lidhur direkt.<\/span><\/em><\/p>\n

Berisha p\u00ebr Fatos Klosin<\/strong><\/span><\/p>\n

Po a kishte lidhje shefi i Sh\u00ebrbimit Informativ me vrasjen? Ata q\u00eb organizojn\u00eb atentate kan\u00eb gjithmon\u00eb informacione. A mund t\u00eb m\u00eb thoni pse ia mbathi t\u00eb nes\u00ebrmen n\u00eb Himar\u00eb. Pasi rregulloi azilin e Fatosit n\u00eb Maqedoni, p\u00ebr vete zgjodhi Himar\u00ebn.<\/span><\/em><\/p>\n

Berisha p\u00ebr vrasjen e Hajdarit<\/strong><\/span><\/p>\n

Azem Hajdari k\u00ebrkohej t\u00eb vritej nga shteti. Ata jan\u00eb p\u00ebrpjekur n\u00eb m\u00ebnyr\u00ebn m\u00eb kriminale ta paraqesin si nj\u00eb sherrnaj\u00eb. Azem Hajdari, familja e Azem Hajdarit, rrethi i Azem Hajdarit s\u2019kan\u00eb patur kurr\u00eb deri dit\u00ebn q\u00eb \u00ebsht\u00eb vra asnj\u00eb sherr m\u00eb t\u00eb vog\u00ebl me band\u00ebn kriminale t\u00eb Haklajve. Azem Hajdari ka q\u00ebllue politikisht kund\u00ebr terrorit, vrasjeve politike q\u00eb kjo band\u00eb kryente n\u00eb Tropoj\u00eb. M\u00eb shum\u00eb se n\u00eb \u00e7do luft\u00eb q\u00eb ka p\u00ebrjetue Tropoja nga 1915. Shteti k\u00ebrkonte ta vriste n\u00ebp\u00ebrmjet k\u00ebtyre. Hajdari nuk kishte asnj\u00eb problem personal me asnj\u00eb prej Haklajve, me asnj\u00eb prej band\u00ebs s\u00eb tyre, kishte problem parimor terrorin politik dhe dhun\u00ebn.<\/span><\/em><\/p>\n

Un\u00eb i thash\u00eb: \u201cAzem, k\u00ebta kan\u00eb porosi dhe jan\u00eb n\u00eb zbatim t\u00eb saj. Mir\u00eb \u00ebsht\u00eb t\u00eb zhdukesh diku gjasht\u00eb muaj.\u201d <\/em><\/span><\/p>\n

Me rregullin e vjet\u00ebr ka dy m\u00ebnyra. O t\u00eb fshihesh, o t\u00eb q\u00ebndrosh. I kishin dal\u00eb n\u00eb prit\u00eb edhe te sht\u00ebpia para 10 dit\u00ebsh. Ata ishin vras\u00ebsit e shtetit.<\/span><\/p>\n

Berisha p\u00ebr Haklajt 2<\/strong><\/span><\/p>\n

K\u00ebrkova q\u00eb policia t\u00eb merrte Fatmir Haklajn, sepse ishin band\u00eb e armatosur dhe ne po shkonim n\u00eb Tropoj\u00eb p\u00ebr fushat\u00eb. Kam k\u00ebrkuar t\u00eb kapet e t\u00eb sillet urgjentisht n\u00eb Tiran\u00eb nj\u00eb bandit q\u00eb q\u00ebllon me arm\u00eb dhe prish rendin.<\/span><\/em><\/p>\n

Berisha p\u00ebr d\u00ebshmitar\u00ebt e vrasjes s\u00eb Hajdarit<\/strong><\/span><\/p>\n

Kam besim t\u00eb plot\u00eb kam te deklaratat e t\u00eb tjer\u00ebve. U jam mir\u00ebnjoh\u00ebs t\u00eb gjith\u00eb atyre q\u00eb me nj\u00eb p\u00ebrgjegj\u00ebsi t\u00eb jasht\u00ebzakonshme v\u00ebrshuan t\u00eb nd\u00ebrtonin ngjarjen dhe t\u00eb denonconi gjith\u00e7ka. Ata edhe mund t\u00eb heshtnin dhe q\u00eb e dinin se ajo mund t\u2019u kushtonte. Erdh\u00ebn dhe asnj\u00eb prej tyre nuk ka g\u00ebnjyer. Deklarata ime ishte deklarat\u00eb dhe jo e njeriut q\u00eb i ka par\u00eb gj\u00ebrat. Hetimi i ka provuar deklaratat t\u00eb gjitha t\u00eb v\u00ebrteta dhe ka shtuar t\u00eb tjera. Ato q\u00eb kan\u00eb d\u00ebshmuar te un\u00eb aktivist\u00eb t\u00eb PD-s\u00eb, ato ajn\u00eb verifikuar n\u00ebp\u00ebrmjet d\u00ebshmitar\u00ebve nga hetimi dhe jan\u00eb n\u00eb dosje t\u00eb gjitha. Dosje q\u00eb ka kaluar tre shkall\u00eb dhe q\u00eb ka shkuar n\u00eb Strasburg dhe s\u2019i \u00ebsht\u00eb prek materia aspak.<\/span><\/p>\n

Berisha p\u00ebr Fatos Klosin (Telefonata)<\/strong><\/span><\/p>\n

N\u00eb prit\u00eb n\u00ebse m\u00eb pyet mua e nxorri Fatos Klosi. Kurth. N\u00eb deklarat\u00ebn time \u00ebsht\u00eb th\u00ebn\u00eb personi q\u00eb m\u00eb erdhi n\u00eb zyr\u00eb dhe m\u00eb tha: Un\u00eb e vrava Azem Hajdarin. Sepse k\u00ebshtu m\u00eb ndodhi, tha. M\u00eb mori n\u00eb telefon filani m\u00eb tha, thuaji Azemit se \u00ebsht\u00eb nj\u00eb makin\u00eb diku aty. Po mir\u00eb i thash\u00eb un\u00eb, kjo nuk q\u00ebndron, s\u2019e ke vra ti. Ai ishte i tronditur. Ky ishte nj\u00eb militant i PD-s\u00eb. Kurthin e organizoi, e serviri, Sh\u00ebrbimi Informativ. Kishte nj\u00eb radio aty, t\u00eb Sh\u00ebrbimit Informativ, jo t\u00eb policis\u00eb. N\u00eb makin\u00ebn nga e cila u q\u00ebllua, nga ku dol\u00ebn vras\u00ebsit. \u00a0\u00c7uan nj\u00eb lajm t\u00eb till\u00eb dhe ky lajm i shkoi Azemit. Pse doli Azemi. Ai b\u00ebri nj\u00eb vler\u00ebsim t\u00eb gabuar q\u00eb doli. Ai nuk ra n\u00eb kurth nga persona t\u00eb brendsh\u00ebm t\u00eb PD-s\u00eb. Un\u00eb nuk besoj q\u00eb t\u00eb ket\u00eb qen\u00eb telefonat\u00eb e t\u00eb af\u00ebrmve t\u00eb Azem Hajdarit. Un\u00eb besoj q\u00eb ky variant q\u00eb m\u00eb \u00ebsht\u00eb treguar ka t\u00eb v\u00ebrtet\u00ebn brenda. Vras\u00ebsit mor\u00ebn telefonin e Azem Hajdarit.<\/span><\/em><\/p>\n

Berisha p\u00ebr vras\u00ebsit e Azem Hajdarit <\/strong><\/span><\/p>\n

Vras\u00ebsit e Azem Hajdarit kryen krimin e shekullit dhe duhet t\u00eb zhdukeshin. Ata q\u00eb vraz\u00eb Azemin i zhduk\u00ebn ekzekutor\u00ebt e Azemit. Haklajt ishin banda m\u00eb terroriste n\u00eb historin\u00eb e veriut. Kurr\u00eb Tropoja nuk njeh n\u00eb historin\u00eb e saj nj\u00eb band\u00eb vrastare, p\u00ebrdhunuese, pla\u00e7kit\u00ebse, barbare si kjo band\u00eb. Pasi kryen misionin ata duheshin zhdukur. I zhduku shteti. Vet\u00ebm shteti mund t\u00eb vendoste nj\u00eb seri minash nj\u00ebra pas tjetr\u00ebs. Shteti duke b\u00ebr\u00eb kombinime me familjet e viktimave. Familjet e viktimave ishin ta angazhuara me t\u00eb gjith\u00eb potencialin e tyre duke qen\u00eb se shteti nuk i d\u00ebnonte ekzekutor\u00ebt. Po t\u00eb donte shteti t\u00eb mos zhdukeshin i arrestonte. Do ishin t\u00eb gjith\u00eb gjall\u00eb sot si Jaho Salihi n\u00eb burg.<\/em><\/span><\/p>\n

Berisha p\u00ebr raportet me Hajdarin<\/strong><\/span><\/p>\n

Akuzat se un\u00eb kam pasur dor\u00eb n\u00eb zhdukjen e Azem Hajdarit jan\u00eb t\u00eb atyre q\u00eb duan t\u00eb mbulojn\u00eb krimin e sh\u00ebmtuar q\u00eb kryen. Un\u00eb marr\u00ebdh\u00ebniet me Azem Hajdarin i kam pasur nga m\u00eb t\u00eb shk\u00eblqyerat.<\/em><\/span><\/p>\n

Berisha p\u00ebr rihapjen e gjykimit<\/strong><\/span><\/p>\n

Un\u00eb e kam kryer detyr\u00ebn time, kam dh\u00ebn\u00eb nj\u00eb deklarat\u00eb q\u00eb \u00ebsht\u00eb \u00a0sht\u00ebrruese p\u00ebr ato q\u00eb kam ditur. Ky \u00ebsht\u00eb nj\u00eb proces i dyt\u00eb politik. Edi Rama hakmerret p\u00ebr Nexhmie Hoxh\u00ebn, p\u00ebr Kristaq Ram\u00ebn, p\u00ebr veten e tij q\u00eb shkoi n\u00eb bunker me dat\u00ebn 20 shkurt. Hapet procesi vet\u00ebm p\u00ebr t\u00eb nxjerr\u00eb nga burgu vras\u00ebsin e kushedi sa personave, q\u00eb \u00ebsht\u00eb Jaho Salihi dhe p\u00ebr t\u00eb nxjerr\u00eb jasht\u00eb pjes\u00ebmarr\u00ebsin n\u00eb k\u00ebt\u00eb vrasje sipas t\u00eb gjitha d\u00ebshmive, Izet Haxhin\u00eb. Q\u00ebllimi i Edi Ram\u00ebs \u00ebsht\u00eb t\u00eb realizoj\u00eb at\u00eb skenar. Rama ka marr\u00eb p\u00ebrsip\u00ebr q\u00eb t\u00eb nxjerr\u00eb nga burgu Jaho Salihin sepse kreu krim n\u00eb em\u00ebr t\u00eb baballar\u00ebve t\u00eb tij. Nuk e fal dot ai nat\u00ebn e bunkerit ku u fut kur u detyrua t\u00eb ik\u00eb nga Tirana. T\u00eb hap\u00ebsh nj\u00eb proces q\u00eb ka kaluar t\u00eb gjita shkall\u00ebt, p\u00ebrfshi edhe Gjykat\u00eb Kushtetuese. Q\u00eb ka kaluar edhe n\u00eb Strasburg.<\/em><\/span><\/p>\n

Berisha p\u00ebr dosjen ‘Hajdari’<\/strong><\/span><\/p>\n

Si ekzekutor\u00eb jan\u00eb t\u00eb gjith\u00eb t\u00eb d\u00ebnuar. T\u00eb ekzekutuar n\u00eb m\u00ebnyra t\u00eb ndryshme. Un\u00eb nuk di t\u00eb ket\u00eb qen\u00eb njeri tjet\u00ebr. Porosit\u00ebsi i vrasjes s\u00eb Azem Hajdarit \u00ebsht\u00eb absolutisht shteti. P\u00ebr mua Fatos Klosi, i cili t\u00eb thot\u00eb vet\u00eb q\u00eb un\u00eb e paralajm\u00ebroja. N\u00ebse nj\u00eb komisar policie k\u00ebrc\u00ebnon dhe vendos t\u00eb vras\u00eb nj\u00eb deputet n\u00eb \u00e7do vend t\u00eb bot\u00ebs ai arrestohet. Shteti t\u00eb arreston. Jonuz Hyka dhe Gani Malushi e paguan me jet\u00eb se guxuan t\u2019u thon\u00eb padron\u00ebve t\u00eb vras\u00ebsve p\u00ebr band\u00ebn e Haklajve dhe krimeve t\u00eb saj n\u00eb Tropoj\u00eb.<\/em><\/span><\/p>\n

P\u00ebrgatiti p\u00ebr Hashtag.al<\/span>, Klodian Manjani<\/span><\/p>\n

Rr\u00ebfimi i Berish\u00ebs nga minuta 19:20 deri n\u00eb minut\u00ebn 47:15<\/span><\/p>\n