Çmimet e naftës shënuan një rritje të fortë këtë të hënë, pasi tregjet reaguan ndaj sulmeve të reja të Izraelit ndaj objektivave në Iran, si dhe tensioneve të vazhdueshme në Lindjen e Mesme, përcjell Reuters.
Nafta e papërpunuar Brent u rrit me 4.42 dollarë, ose 4.47%, duke arritur në 97.15 dollarë për fuçi, ndërsa nafta amerikane WTI u ngjit me 4.07 dollarë, ose 4.50%, në 94.61 dollarë për fuçi.
Sipas raportimeve, Izraeli ka goditur një kompleks petrokimik në jugperëndim të Iranit, si dhe objektiva të tjera ushtarake. Autoritetet iraniane konfirmuan dëmtime në pjesë të kompleksit petrokimik Mahshahr, duke shënuar një nga goditjet e para ndaj infrastrukturës energjetike iraniane që prej armëpushimit të 8 prillit.
Zhvillimet e fundit kanë zbehur shpresat për një përfundim të afërt të konfliktit dhe për rifillimin normal të qarkullimit të naftës përmes Ngushticës së Hormuzit, një rrugë detare strategjike ku kalon rreth një e pesta e tregtisë botërore të naftës dhe gazit të lëngshëm.
Rritja e së hënës fshiu humbjet e regjistruara të premten, kur tregjet kishin reaguar pozitivisht ndaj sinjaleve për një ulje të tensioneve mes Shteteve të Bashkuara dhe Iranit. Që nga fillimi i luftës në fund të muajit shkurt, çmimet e naftës janë rritur me afro 60%.
Ndërkohë, Irani ka deklaruar se Ngushtica e Hormuzit do të mbetet e hapur, por me kushte të reja që do të përcaktohen nga autoritetet iraniane dhe ato të Omanit, përfshirë edhe tarifa tranziti për anijet që kalojnë nëpër të.
Në të njëjtën kohë, vendet e OPEC+ kanë rënë dakord për rritjen e prodhimit të naftës për të katërtin muaj radhazi. Megjithatë, analistët vlerësojnë se ndikimi i këtij vendimi në treg do të jetë i kufizuar, pasi shumë vende prodhuese po përballen me vështirësi në arritjen e objektivave të tyre të prodhimit për shkak të konfliktit dhe problemeve infrastrukturore.
