Kryetari i Partisë Demokratike, Sali Berisha, ka reaguar përmes një deklarate publike lidhur me debatet e krijuara rreth qëndrimit të opozitës ndaj protestës qytetare kundër projektit në Zvërnec, duke theksuar se PD mbështet plotësisht protestuesit dhe pesë kërkesat e paraqitura prej tyre.
Në reagimin e tij, Berisha thekson se Partia Demokratike ka dënuar që në fillim, sipas tij, dhunën ndaj protestuesve në Zvërnec, si dhe mënyrën e trajtimit të tyre nga qeveria.
“Partia Demokratike që në fillim ka deklaruar se dënon me forcën më të madhe dhunën dhe rrëmbimin e protestuesve paqësorë në Zvërnec, epitetet e përdorura nga Edi Rama ndaj tyre dhe rrethimin e fshatit me tela me gjemba, si në kohë pushtimesh”, shkruan Berisha.
Ai sqaron se protesta nuk është organizuar nga PD, por nënvizon se forca politike që drejton e respekton të drejtën e qytetarëve për të protestuar dhe nuk u ka kërkuar asnjëherë anëtarëve apo mbështetësve të saj të mos marrin pjesë në tubime.
Sipas Berishës, Partia Demokratike mbështet largimin e qeverisë së kryeministrit Edi Rama dhe i konsideron të drejta kërkesat e protestuesve për shfuqizimin e një sërë ligjesh që lidhen me investimet strategjike, Partneritetet Publiko-Private, Paketën e Maleve, mjedisin dhe trashëgiminë kulturore.
“Partia Demokratike mbështet fuqimisht largimin e regjimit të paligjshëm e narkodiktatorial të Edi Ramës”, shprehet ai në deklaratë.
Berisha argumenton se opozita i ka kundërshtuar prej vitesh këto ligje në Parlament dhe në institucione të tjera, duke shtuar se mbështetja ndaj kërkesave të protestuesve është në përputhje me qëndrimet e mbajtura më herët nga PD.
Në deklaratë, kreu i demokratëve ndalet edhe te çështjet mjedisore, duke renditur një sërë projektesh që sipas tij janë kundërshtuar nga opozita, përfshirë zhvillimet në Butrint, Shebenik, Dajt, Luginën e Drinit dhe Aeroportin e Vlorës.
Njëkohësisht, Berisha thekson se Partia Demokratike nuk është kundër investimeve të huaja në Shqipëri, por kërkon që ato të realizohen në përputhje me legjislacionin vendas dhe standardet ndërkombëtare.
“Partia Demokratike nuk është dhe nuk do të jetë kurrë kundër investimeve të huaja në Shqipëri. Ajo i ka mirëpritur dhe do t’i mirëpresë ato me kushtin e vetëm dhe të panegociueshëm që të bëhen në përputhje të plotë me ligjet e vendit dhe ato ndërkombëtare”, thuhet në reagim.
Në përfundim, Berisha e konsideron mungesën e transparencës së qeverisë për projektin e Zvërnecit si shkakun kryesor të protestave dhe i bën thirrje kryeministrit Rama të heqë dorë nga, sipas tij, gjuha përçarëse ndaj protestuesve.
“Partia Demokratike mbështet plotësisht pesë kërkesat e drejta të përfaqësuesve të Lëvizjes së fuqishme rinore e qytetare dhe i kërkon Edi Ramës të heqë dorë nga kërcënimet, arroganca, përçmimi dhe etiketimet e protestuesve”, deklaron Berisha, duke kërkuar dorëheqjen e kryeministrit dhe krijimin e një qeverie kujdestare për organizimin e zgjedhjeve të lira dhe të ndershme.
Postimi i Berishës:
SQARIM
Lidhur me disa shkrime dhe komente të mediave për qëndrimet e Partisë Demokratike ndaj protestës së fuqishme rinore e qytetare, sqaroj sa vijon:
Së pari: Partia Demokratike që në fillim ka deklaruar se dënon me forcën më të madhe dhunën dhe rrëmbimin e protestuesve paqësorë në Zvërnec, epitetet e përdorura nga Edi Rama ndaj tyre dhe rrethimin e fshatit me tela me gjemba, si në kohë pushtimesh.
Së dyti: Kjo protestë nuk është thirrur nga PD-ja, por ne e respektojmë atë dhe të drejtën e çdo qytetari për të protestuar. Partia Demokratike nuk u ka kërkuar asnjëherë anëtarëve dhe mbështetësve të saj që të mos e mbështesin apo të mos shkojnë në protestë, pavarësisht disa thirrjeve të orkestruara nga “opozita e opozitës” si vegël e faktuar e qeverisë kundër nesh dhe për agjendën e vet politike. Duke i konsideruar këto thirrje si përpjekje të “opozitës së opozitës” për të manipuluar politikisht protestën rinore e qytetare në funksion të agjendës së vet politike, qëndrimi ynë ishte i qartë: nuk duhet që gjethet apo degëzat të na pengojnë të shohim trungun madhështor të protestës së rinisë dhe qytetarëve shqiptarë.
Partia Demokratike është forca kryesore politike opozitare që këto vitet e fundit ka qëndruar fuqishëm dhe ka paguar çmimin më të lartë në përballjen me narkoregjimin e Edi Ramës, këtij “Pashiqi” shqipfolës – por edhe me mbështetësit ndërkombëtarë të regjimit të tij. Ajo arriti të faktojë me vendosmëri para shqiptarëve dhe botës vërtetësinë e kauzës së saj, përmes 8 rezolutave të organizatave politike më të mëdha në botë dhe raporteve kryesore të institucioneve më të rëndësishme ndërkombëtare, në të cilat dënohen me unanimitet shtypja e opozitës dhe pluralizmit politik, farsa elektorale, narkoshteti dhe plaçkitja e shqiptarëve nga Edi Rama dhe organizata e tij kriminale.
Ndaj, edhe pas formulimit dhe paraqitjes publike të pesë kërkesave nga përfaqësuesit e Lëvizjes së fuqishme rinore e qytetare, Partia Demokratike mbështet fuqimisht largimin e regjimit të paligjshëm e narkodiktatorial të Edi Ramës, kreut të organizatës kriminale më të rrezikshme në Evropë, kundër të cilit ajo organizoi 8 protesta të fuqishme si kryengritje paqësore kombëtare.
Kurse lidhur me mbështetjen e kërkesave të përfaqësuesve të Lëvizjes së fuqishme rinore e qytetare për anulimin e një sërë ligjesh të narkoqeverisë që lidhen me investimet strategjike, Korporatën e Investimeve, Partneritetet Publiko-Private (PPP), Paketën dhe Portën e Maleve, mjedisin dhe trashëgiminë kulturore, pa asnjë përjashtim, të gjitha ato janë kundërshtuar me forcën më të madhe nga PD-ja dhe grupi i saj parlamentar në komisionet dhe seancat parlamentare, e madje, në raste të caktuara, edhe në gjykatat e kontrolluara nga qeveria, ndaj dhe ajo i mbështet pa asnjë rezervë këto kërkesa.
Partia Demokratike ka vlerësuar dhe vlerëson shumë ndjeshmërinë dhe shpirtin e protestës së të rinjve, qytetarëve dhe shoqërisë civile për mbrojtjen e mjedisit si një arritje të madhe për kombin dhe Shqipërinë, por shton me vërtetësi se ajo është forca më e madhe politike që ka denoncuar dhe protestuar më shumë se kushdo tjetër kundër batërdisë nga qeveritarët dhe oligarkët e qeverisë në:
Parkun Kombëtar të Butrintit;
Parkun Kombëtar të Shebenikut;
Parkun Kombëtar të Dajtit;
Luginën e Drinit me Hidrocentralin e Skavicës;
Ndërtimin e Aeroportit të Vlorës dhe de fakto asgjësimin e habitatit të shpendëve në Lagunën e Nartës;
Shkatërrimin e shtratit të lumenjve Shkumbin, Mat, etj.
Për të gjitha këto, ajo është krenare edhe për çmimin që ka paguar.
Së fundmi, Partia Demokratike nuk është dhe nuk do të jetë kurrë kundër investimeve të huaja në Shqipëri. Ajo i ka mirëpritur dhe do t’i mirëpresë ato me kushtin e vetëm dhe të panegociueshëm që të bëhen në përputhje të plotë me ligjet e vendit dhe ato ndërkombëtare.
Në këtë pikë, PDSH është e bindur se shkaku më themelor i protestës qëndron tek mungesa totale e transparencës nga Edi Rama në rastin e Zvërnecit, si në çdo rast tjetër në të cilat ai sillet si sulltan i një sulltanati jashtë kohe.
Duke përfunduar: Partia Demokratike mbështet plotësisht pesë kërkesat e drejta të përfaqësuesve të Lëvizjes së fuqishme rinore e qytetare dhe i kërkon Edi Ramës të heqë dorë nga kërcënimet, arroganca, përçmimi dhe etiketimet e protestuesve. Për një zgjidhje të vetme politike, ai duhet të japë menjëherë dorëheqjen, të plotësojë kërkesat e përfaqësuesve të Lëvizjes së fuqishme rinore e qytetare dhe të krijohet një qeveri kujdestare për përgatitjen e zgjedhjeve të lira dhe të ndershme në Shqipëri.
