Rusia goditi kryeqytetin e Ukrainës, Kievin, të dielën me një valë masive raketash dhe dronësh që dëmtuan ndërtesa banimi, zyra dhe shkolla, duke vrarë të paktën një person dhe plagosur 21 të tjerë, thanë zyrtarët.
Shpërthime të fuqishme u dëgjuan në të gjithë qytetin pak pas orës 01:00 të mëngjesit, pasi forcat ajrore ukrainase paralajmëruan në kanalin e tyre në Telegram se Rusia mund të lëshonte një raketë balistike hipersonike Oreshnik.
Forcat ajrore nuk iu përgjigjën kërkesës për koment nëse ndonjë raketë Oreshnik goditi objektiva gjatë sulmit.
Kryebashkiaku i Kievit, Vitali Klitschko, tha në Telegram se besohet që një person ka humbur jetën pasi një ndërtesë banimi nëntëkatëshe në distriktin qendror Shevchenko u godit. Shërbimet e emergjencës ndodheshin në vendngjarje duke shuar zjarrin, tha ai.
Klitschko shtoi se 21 persona u plagosën, nga të cilët 13 u shtruan në spital dhe tre janë në gjendje të rëndë. Sirenat e alarmit ajror u dëgjuan sërish pas lindjes së diellit të dielën në Kiev, shkruan Reuters.
Shumë banorë kërkuan strehim gjatë natës në stacionet e metrosë së qytetit. Sulme u raportuan edhe në pjesë të tjera të Ukrainës. Tre persona të tjerë u plagosën në rajonin më të gjerë të Kievit, sipas guvernatorit Mykola Kalashnyk.
