Situata në Lindjen e Mesme ka marrë një kthesë dramatike pas sulmit të fundit izraelit mbi një nga pikat më strategjike të ekonomisë iraniane. Izraeli konfirmoi se ka goditur sitin gjigant petrokimik në Asaluyeh, i cili sipas inteligjencës izraelite, prodhon gjysmën e kapacitetit petrokimik të gjithë Iranit.
Ky sulm vjen menjëherë pas paralajmërimeve të ashpra të Presidentit amerikan Donald Trump, i cili ka kërcënuar me goditje akoma më të mëdha mbi infrastrukturën iraniane nëse Ngushtica e Hormuzit nuk hapet deri të martën.
“E marta do të jetë ‘Dita e Centraleve Energjetike’ dhe ‘Dita e Urave’, të gjitha të bëra bashkë në Iran. Nuk do të ketë asgjë të ngjashme me këtë më parë!” — deklaroi Trump në një paralajmërim të koduar me gjuhë të ashpër.
Paralelisht me sulmet në infrastrukturë, një tjetër goditje e rëndë i është dhënë Teheranit. Irani njoftoi se shefi i inteligjencës së Gardës Revolucionare (IRGC), Majid Khademi, u vra në një sulm të përbashkët SHBA-Izrael mëngjesin e kësaj të hëne, përgjegjësi të cilën Izraeli e pranoi zyrtarisht më vonë.
Në rrafshin diplomatik, raportohet për përpjekje intensive të minutës së fundit për të shmangur një luftë totale, ndonëse burime brenda bisedimeve thonë se kushti i parë mbetet armëpushimi.
Megjithatë, Shtëpia e Bardhë ka bërë të ditur se Presidenti Trump nuk ka nënshkruar ende asnjë plan për ndalimin e zjarrit.
“Diplomacia e ethshme po përshpejtohet, por ka nevojë për një armëpushim fillimisht,” — raportojnë korrespondentët nga terreni, ndërsa sulmet vazhdojnë në të gjithë rajonin, përfshirë Libanin, sipas BBC.
Në këtë vorbull luftimesh, Izraeli ka pranuar gjithashtu se në një sulm të kryer të dielën në Liban, objektivi ka qenë i gabuar, duke shkaktuar viktima mes personave të paimplikuar në konflikt. Situata mbetet tejet e paqëndrueshme, me sytë e botës të kthyer nga ajo që Trump e ka cilësuar si “e marta vendimtare”.
