Djali i princeshës së kurorës së Norvegjisë, Marius Borg Høiby, është arrestuar me akuza të reja vetëm pak ditë përpara nisjes së gjyqit ndaj tij për përdhunim, në një moment kur nëna e tij, princesha e kurorës Mette-Marit, po përballet me pyetje të shumta lidhur me marrëdhënien e saj të mëparshme me Jeffrey Epstein.
Policia e Oslos njoftoi se Høiby u arrestua të dielën në mbrëmje, nën dyshimin për ushtrim dhune fizike, kërcënime me thikë dhe shkelje të një urdhri ndalimi afrimi.
Arrestimi vjen pak ditë përpara se 29-vjeçari të dalë në gjyq për 38 vepra penale, përfshirë katër akuza për përdhunim, dhunë në familje ndaj një ish-partnereje dhe filmim të paligjshëm të disa grave pa dijeninë apo pëlqimin e tyre, sipas The Guardian.
Gjyqi pritet të nisë të martën në Oslo dhe të zgjasë rreth shtatë javë. Høiby ka mohuar akuzat më të rënda, përfshirë ato për abuzim seksual.
Policia ka kërkuar që Høiby të mbahet në paraburgim për katër javë, me arsyetimin se ekziston rreziku i përsëritjes së veprave penale.
Gjykata e Qarkut në Oslo vendosi që ai të mund të qëndrojë në paraburgim deri më 2 mars, ose deri në një vendim tjetër nga prokuroria apo gjykata.
Prokurori i policisë, Andreas Kruszewski, deklaroi: “Policia e Oslos mund të konfirmojë se Marius Borg Høiby u arrestua të dielën në mbrëmje dhe akuzohet për shkaktim dëmtimi trupor, kërcënime që përfshijnë përdorimin e një thike dhe shkelje të një urdhri ndalimi.”
Arrestimi i Høiby vjen në një moment tensioni të lartë për familjen mbretërore norvegjeze.
Gjatë fundjavës, princesha e kurorës Mette-Marit u detyrua të reagojë ndaj zbulimeve mbi kontaktet e saj me Jeffrey Epstein, pasi emri i saj u përmend afro 1.000 herë në dosjet e sapohapura të publikuara nga Departamenti i Drejtësisë i SHBA-së të premten.
Ndërsa publiku norvegjez ishte në dijeni prej kohësh për afrimin e gjyqit të Høiby, përfshirja e Mette-Marit në dokumentet e Epstein ka ardhur si një surprizë e madhe.
Në këto dokumente, Mette-Marit e përshkruan Epstein si “shumë simpatik”, “zemërbutë” dhe “një njeri i ëmbël”, duke lënë të kuptohet se ata kanë qenë në kontakt të afërt mes viteve 2011 dhe 2014, pra disa vite pasi Epstein kishte pranuar fajësinë në SHBA për akuza që përfshinin kërkimin e shërbimeve seksuale nga një e mitur.
Në një deklaratë të lëshuar të shtunën, princesha e kurorës tha se dokumentet tregojnë “gjykim të dobët” nga ana e saj, duke shtuar: “E pendoj thellësisht që kam pasur ndonjë kontakt me Epstein. Është thjesht e turpshme.”
Gazetarja dhe kolumnistja e tabloidit norvegjez VG, Shazia Majid, tha se këto emaile kanë dalë në publik “në momentin më të keq të mundshëm”. Sipas saj, “ka qenë një goditje e fortë. Njerëzit flasin për këtë kudo dhe ka një ndjenjë të fortë zemërimi dhe zhgënjimi.”
Mbështetja për familjen mbretërore është goditur të paktën në afat të shkurtër, por Majid beson se në planin afatgjatë publiku do të vazhdojë të mbështesë Mbretin Harald V, Mbretëreshën Sonja dhe Princin e Kurorës Haakon.
Të martën, parlamenti norvegjez pritet të votojë mbi një propozim për zëvendësimin e monarkisë, një votim që zhvillohet një herë në katër vjet.
Edhe pse nuk pritet të kalojë, kjo nismë mund të ketë më shumë mbështetje se në vitet e mëparshme. Gazeta Aftenposten ngriti pyetjen: “A mund të bëhet Mette-Marit mbretëreshë pas kësaj?”
Kryeministri norvegjez, Jonas Gahr Støre, deklaroi se pret që “norvegjezët e përmendur” në dokumente të shpjegojnë të vërtetën mbi atë që ka ndodhur. Ai shtoi se pajtohet me vlerësimin e princeshës së kurorës se ajo ka treguar gjykim të dobët.
Përfshirja në këto dokumente nuk nënkupton domosdoshmërisht kryerje veprash penale.
Mette-Marit, e cila vuan nga fibrozë pulmonare dhe ka deklaruar së fundmi se mund të ketë nevojë për transplant mushkërish, u martua me Princin e Kurorës Haakon në vitin 2001. Djali i saj, Marius Borg Høiby, ka lindur nga një lidhje e mëparshme.
Sipas dokumenteve, Mette-Marit kishte ndërprerë kontaktet me Epstein në vitin 2014, pasi, sipas pallatit mbretëror, ai po përpiqej të përdorte marrëdhënien me të për të ndikuar tek persona të tjerë.
