Ilaçi për humbje peshe Ozempic mund të çojë në humbje të shikimitPacientët që marrin ilaçet për humbje peshe dhe diabet, Wegovy dhe Ozempic, kanë një rrezik në rritje për të zhvilluar një sëmundje të rrallë të syrit që mund të çojë në humbje të shikimit, njoftoi të premten një komitet i Agjencisë Evropiane të Barnave (EMA).
Komiteti i sigurisë së ilaçeve (PRAC) i EMA-s nisi një shqyrtim të ilaçeve që përmbajnë semaglutide – një agonist GLP-1 dhe përbërësi aktiv në Ozempic, Wegovy dhe Rybelsus të Novo Nordisk – në janar, pas shqetësimeve se ilaçet mund të çonin në një rrezik në rritje të zhvillimit të neuropatisë optike iskemike anteriore jo-arteritike (NAION).
NAION është një çrregullim i shkaktuar nga rrjedhja e pakësuar e gjakut në nervin optik në sy, i cili mund të dëmtojë nervin dhe të çojë në humbje të përhershme të shikimit, shkruan Politico.
PRAC tha se zbuloi se kjo gjendje është “një efekt anësor shumë i rrallë” i semaglutidës, që potencialisht prek deri në një në 10,000 njerëz që marrin ilaçin. EMA tha se ekspozimi ndaj semaglutidës tek njerëzit me diabet është i lidhur me një rritje dyfish të rrezikut të zhvillimit të NAION krahasuar me njerëzit që nuk e marrin ilaçin.
Rregullatori ka kërkuar që informacioni i produktit për ilaçet me semaglutidë të përditësohet për të përfshirë NAION si një efekt anësor me një frekuencë “shumë të rrallë”. Vendimi përfundimtar duhet të miratohet nga Komisioni Evropian.
