Vendosni fjalën kyçe....

Mijëra afganë të evakuuar nga Britania e Madhe mbeten ende nëpër hotele


Mijëra qytetarë afganë që i shërbenin Britanisë në ushtrinë e saj dhe organet e tjera u evakuuan me familjet e tyre nga Afganistani në atë që u raportua si evakuimi më i madh ushtarak britanik në mbi 70 vjet, sipas AA.

Megjithëse shumica e më shumë se 21,000 refugjatëve tani janë vendosur në strehimore, pothuajse gjysma e të evakuuarve janë ende të bllokuar në hotele. Sipas shifrave të fundit të siguruara nga Home Office, 9,242 individë janë vendosur në 63 hotele në të gjithë Mbretërinë e Bashkuar, dhe “rreth gjysma” janë fëmijë.

Mbretëria e Bashkuar evakuoi rreth 18,000 njerëz, duke përfshirë më shumë se 6,000 shtetas britanikë, në dy javët pas marrjes së Afganistanit nga Talibanët në mesin e gushtit 2021. Por pas përfundimit të evakuimit, mijëra vazhduan të largoheshin nga vendi dhe aplikuan për skemën e zhvendosjes së qytetarëve afganë (ACRS) ose Politika e Zhvendosjeve dhe Asistencës në Afganistan (ARAP).

Disa arritën në Mbretërinë e Bashkuar vetë dhe aplikuan në njërën prej atyre skemave, ndërsa të tjerët dorëzuan aplikimet e tyre përmes misioneve diplomatike britanike në vendet fqinje. Duke folur për Anadolu, Fahim Zazai, themeluesi i Qendrës së Komunitetit dhe Mirëqenies afgane në Walsall, tha se ata që qëndrojnë në hotele nuk ishin të gjithë të evakuuar, por gjithashtu përfshinin shumë që mbërritën në muajt e mëvonshëm.

Sipas mediave britanike, këta refugjatë afganë po strehohen në hotele britanike me një kosto prej rreth 1 milion paund (1.2 milion dollarë) në ditë. Meqenëse Mbretëria e Bashkuar po kalon një krizë të kostos së jetesës, shumë pyesin pse qeveria nuk po bën më shumë për t’i nxjerrë këto familje nga hotelet.

Kriza e strehimit mund të përkeqësohet akoma pasi qindra refugjatë ukrainas, që aktualisht po strehohen nga sponsorët e tyre britanikë, mund të shtojnë barrë shtesë mbi autoritetet lokale, të cilët tashmë ankohen se nuk kanë shtëpi të mjaftueshme për të përmbushur kërkesën.