Për herë të parë në dekada, mijëra kinezë kanë sfiduar autoritetet për të protestuar në universitete dhe në rrugët e qyteteve të mëdha, duke kërkuar që të çlirohen jo vetëm nga testet dhe bllokimet e pandërprera Covid, por edhe nga censura e rreptë dhe kontrolli i ashpër i Partisë Komuniste mbi të gjitha aspektet e jetës, shkruan CNN.
Thirrja në gjithë vendin ‘duam liri’ është bërë një thirrje për tubimin e protestave të udhëhequra kryesisht nga brezi i ri, të cilët po shprehin hapur mospajtimin kundër qeverisë.
“Liri ose vdekje!” – brohorasin turmat në disa qytete, sipas videove që qarkullojnë në internet, ndërsa vigjilja për të shënuar vdekjen e të paktën 10 personave në një zjarr në Xinjiang u shndërrua në mitingje politike, thekson CNN në shkrimin e saj kushtuar protestave të fundit në Kinë.
Videot që qarkullojnë në internet duket se sugjerojnë se politika e rreptë e Kinës për zero-Covid fillimisht parandaloi punonjësit e urgjencës të hynin në vendin e ngjarjes, duke zemëruar banorët në të gjithë vendin që kanë duruar tre vjet kontrolle të rrepta Covid.
Disa protestues brohoritën duke kërkuar lirinë e fjalës, demokraci, sundimin e ligjit, të drejtat e njeriut dhe kërkesa të tjera politike nëpër qytete nga qendra financiare lindore e Shangait deri në kryeqytetin Pekin, metropolin jugor të Guangzhou dhe Chengdu në perëndim.
CNN ka verifikuar protestat në 16 vende, me raportime për të tjera të mbajtura në dhjetëra qytete dhe universitete të tjera në të gjithë vendin.
Ndërsa protestat në disa pjesë të Kinës duket se janë shpërndarë kryesisht në mënyrë paqësore gjatë fundjavës, disa patën një përgjigje më të fortë nga autoritetet dhe siguria është forcuar nëpër qytete në një vend ku autoritetet kanë aftësi të gjera mbikëqyrjeje dhe sigurie.
Në Pekin, një prani e fortë e policisë ishte e dukshme të hënën në mbrëmje, një ditë pasi protestat shpërthyen atje.
Kur u pyet të hënën nëse ‘shfaqja e përhapur e zemërimit dhe zhgënjimit’ e parë në gjithë vendin mund ta shtyjë Kinën të largohet nga qasja e saj zero-Covid, një zëdhënës i Ministrisë së Jashtme hodhi poshtë sugjerimet.
“Ajo që përmendët nuk pasqyron atë që ndodhi në të vërtetë.” – tha zëdhënësi Zhao Lijian, i cili shtoi se autoritetet kishin ‘bërë rregullime’ në politikat e tyre për Covid bazuar në ‘realitetet në terren’.
“Ne besojmë se me udhëheqjen e Partisë Komuniste Kineze dhe popullin kinez lufta jonë kundër Covid-19 do të jetë e suksesshme.” – tha ai.
