Kryetari i Partisë Demokratike, Sali Berisha mbajti sot një konferencë për media në Shkodër, pasi vizitoi disa nga zonat e përmbytura.
Berisha akuzoi qeverinë e kryeministrit Edi Rama si përgjegjëse për situatën e vështirë me përmbytjet. Sipas tij përmbytjet erdhën nga keqadministrimi i kaskadës absolutisht të diktuar nga “vjedhja qeveritare”.
“Erdha sot pasi kam ndjekur gjatë natës dhe dje pasdite me shqetësim, zhvillimet e paralajmëruara në qarkun e Shkodrës dhe erdha për të shprehur solidaritetin tim më të thellë për të gjithë banorët e këtij qarku, për autoritet vendore, kryetarin e Bashkisë, kryepleqtë, përgjegjësit e njësive administrative për përpjekjet e tyre shumë të mëdha në kushte shumë të vështira.
Kjo fatkeqësi natyrore sigurisht nuk është e rrallë, por krejt e veçantë kësaj here, është gjithçka jo dora e Zotit, por dora e robit hajdut.
Pse e them këtë?! Jua shpjegoj… E them unë këtë, sepse kjo u krijua kryekëput nga keqadministrimi i kaskadës absolutisht të diktuar nga vjedhja qeveritare. Çfarë ka ndodhur?! Gjatë këtyre ditëve, që ta dinë qytetarët mbarë, Edi Rama dhe ministrja e tij Balluku, nuk kanë prodhuar energji, por kanë blerë energji me 226 megavatin në bursë! Në një kohë kur energjia e kontraktuar 10 milionë euro mund të prodhohej pa asnjë lloj kufizimi, pasoje, në kaskadën e Drinit.
Sot, Edi Rama fajin e gjen tek mediat dhe opozita dhe opozita për katastrofën që krijoi vetë. Do të më falni. Po pse them unë është ‘dora e robit hajdut’?! Sepse një javë më parë, IGJEUM, institute shtetëror, i ka dërguar në zyrat e të gjithë vendimmarrësve kryesorë, sinoptikën me përpikmëri të madhe duke informuar se do të ketë reshje të fuqishme në Alpe, reshje të jashtëzakonshme në Alpe dhe se duhet të merren masa. Por përveç Gjeoshkencës, do të më lejoni t’ua lexoj edhe se çfarë thotë Meteoëeb i Italisë, pikërisht për Shqipërinë disa ditë më parë.”– tha Berisha.
