Drejtori i ri i Përgjithshëm i Policisë së Shtetit Muhamet Rrumbullaku ka pritur sot në një takim ambasadorin e Italisë, Fabrizio Bucci.
Sikurse bën me dije zyra e shtypit e Policisë së Shtetit, Rrumbullaku i ka prezantuar ambasadorit Bucci standardet që kërkon të vendosen kundër luftës ndaj krimit në vend.
Kreu i Policisë e garantoi këtë të fundit se bashkëpunimi me homologët italianë do të thellohet edhe më tej.
“Drejtori i Policisë e garantoi ambasadorin se bashkëpunimi mjaft i mirë i deritanishëm do të thellohet akoma më tej, për të luftuar me më efikasitet krimin e organizuar, trafiqet e paligjshme, kultivimin dhe trafikimin e lëndëve narkotike.”– thuhet në njoftim.
Ambasadori nga ana tjetër e uroi Rrumbullakun për detyrën dhe e siguroi për mbështetjen e ambasadës dhe të Policisë italiane. Bucci theksoi se tashmë është koha për të arritur rezultate më të mira nga ana e Policisë Shqiptare.
NJOFTIMI I POLICISË
Drejtori i Përgjithshëm i Policisë së Shtetit Drejtues Madhor Muhamet Rrumbullaku priti në një takim prezantues, ambasadorin e Italisë në Shqipëri, Shkëlqesinë e Tij Fabrizio Bucci, i cili shoqërohej nga drejtuesit e Interforcës italiane në Shqipëri.
Drejtori i Përgjithshëm i Policisë falënderoi ambasadorin, për vizitën, kontributin dhe mbështetjen e dhënë nga ana e tij për Policinë e Shtetit. Ai e njohu ambasadorin, me standardet që kërkon të vendosë, për të pasur një qasje të re ndaj qytetarëve, ndaj luftës kundër krimit të organizuar dhe krimit në përgjithësi.
Drejtori i Policisë e garantoi ambasadorin se bashkëpunimi mjaft i mirë i deritanishëm do të thellohet akoma më tej, për të luftuar me më efikasitet krimin e organizuar, trafiqet e paligjshme, kultivimin dhe trafikimin e lëndëve narkotike.
Shtimi i grupeve hetimore të përbashkëta, shkëmbimi i informacionit në kohë reale, duke eliminuar çdo pengesë apo burokraci, si dhe zhvillimi i operacioneve të përbashkëta me Policinë italiane, janë mënyrat e duhura për të arritur rezultate më të mira.
Prioritare për Policinë e Shtetit janë edhe reformimi i Akademisë së Sigurisë sipas modelit të Akademisë së Sigurisë të Italisë dhe forcimi i strukturave për hetimin e krimeve kibernetike.
Ambasadori Fabrizio Bucci e uroi Drejtorin e ri të Përgjithshëm të Policisë së Shtetit, për detyrën dhe e siguroi për mbështetjen e ambasadës dhe të Policisë italiane, për thellimin e bashkëpunimit në të ardhmen, për të përmbushur sa më mirë misionin e përbashkët, luftën pa kompromis kundër krimit të organizuar, krimit kibernetik dhe terrorizmit. Bucci theksoi se tashmë është koha për të arritur rezultate më të mira nga ana e Policisë së Shtetit.
