Partia Demokratike vijon me pyetësorin e përditshëm për Inceneratorët. Anëtari i Këshillit Kombëtar, Jamarbër Malltezi ka dalë në një deklaratë nga selia blu, ku shprehet se qeveria injoroi financimin prej 4 milionë eurosh të BE për të vrapuar pas një propozimi të pakërkuar për inceneratorët.
“Paguhet shumë për ta varrosur aferën e inceneratorëve, me të cilën kanë vjedhur 105 milion euro deri tani, dhe vijojnë çdo ditë. Jo vetëm para’ të shqiptarëve, por edhe taksapaguesve europianë. Bashkimi Europian ka dhënë 4 milionë euro për përafrim legjislacioni mjedisor përmes projekteve STEMA dhe Selea. Sapo u sinkronizuan ligjet, u hartuan Strategjia dhe Plani Kombëtar i Mbetjeve.
Këto u injoruan dhe u vrapua pas një propozimi të pakërkuar për inceneratorë. Inceneratorët bien ndesh, qoftë me strategjinë, qoftë me planin e veprimit të financuara nga Bashkimi Europian.”- u shpreh Malltezi.
Pas këtyre fjalëve ai ngre 5 pyetjet e radhës të PD-së drejtuar SPAK-ut. Mes tyre pyet se çfarë halli apo pazari e detyroi Ramën të gënjente se u kryen 10 procedura brenda 1 dite.
Ai thotë se “Këto janë pyetje shumë të thjeshta për shqiptarët, por shuuuumë të vështira për drejtësinë e Soros. Ne kemi një përfundim: Të gjitha këto ndodhin SEPSE ATA I NDAJNE PARATË SË BASHKU. Të dashur shqiptarë, ju si mendoni?”.
Pesë pyetjet për SPAK:
- Pse u dhunua Strategjia dhe Plani Kombëtar për Menaxhimin e Mbetjeve që ishin në fuqi?
- Pse u firmos kontrata, ndonëse APP kish sqaruar se procedura ishte e kundraligjshme?
- Edi Ramën e zuri ndonjë hall i madh apo bëri ndonjë pazar po kaq të madh që firmosi kontratë në kundërshtim me ligjin?
- Pse u mashtrua sikur kompania e sapokrijuar kishte eksperiencë të madhe me incenerimin? Si qëlloka që miqtë e Edi Ramës dhe Arben Ahmetajt qenkan ‘nonat e incenerimit’?
- Çfarë halli apo pazari e detyruan Edi Ramën që gënjeu sikur u kryen 10 procedura brenda 1 dite?
