Kina bën thirrje për një ‘”armëpushim të menjëhershëm’ në Ukrainë dhe rifillimin e bisedimeve midis të gjitha palëve të përfshira në konflikt, duke përfshirë SHBA-në dhe NATO-n, tha ambasadori kinez në SHBA, Qin Gang.
Duke folur në Forumin e Sigurisë në Aspen në Kolorado, Qin tha se konflikti i vazhdueshëm në Ukrainë po përhapte dhe po shkaktonte kriza të shumta, duke përfshirë rënien ekonomike, një fluks emigrantësh dhe mungesë të energjisë dhe ushqimit.
“Ajo që Kina po kërkon është armëpushimi i menjëhershëm, rifillimi i bisedimeve të paqes. Të gjitha palët e përfshira duhet të përfshihen, duke përfshirë Rusinë dhe SHBA-në dhe aleatët e saj në NATO.” -tha ambasadori.
Sipas ambasadorit, Pekini beson se ‘sovraniteti kombëtar dhe integriteti territorial i të gjitha vendeve duhet të respektohet’ dhe se ‘shqetësimet e ligjshme të sigurisë të të gjitha vendeve duhet të merren seriozisht’.
Ndërkohë, dy ditë më parë, ministri i Jashtëm ukrainas Dmitry Kuleba deklaroi se negociatat e paqes me Moskën do të kishin kuptim vetëm pas humbjes së Rusisë në fushën e betejës. Duke thënë kështu, ai i bëri jehonë komenteve të shefit të politikës së jashtme të BE-së, Josep Borrell, i cili pohoi se, ‘Lufta në Ukrainë do fitohet në fushën e betejës’.
Zëdhënësja e Ministrisë së Punëve të Jashtme ruse Maria Zakharova iu përgjigj deklaratës së Kulebas duke thënë se qeveria ukrainase nuk kërkon paqe për vendin dhe në vend që të bisedonte me Rusinë, zgjodhi të këndonte sipas ‘melodisë’ së Uashingtonit.
